Kiungo wa Simba SC, Libasse Gueye, anaendelea kung’ara katika Ligi Kuu ya NBC msimu wa 2026/2027, akiongoza orodha ya wachezaji wenye pasi nyingi za mwisho zilizozaa mabao (assists), akiwa amefikisha jumla ya pasi saba za mabao.

Gueye amekuwa miongoni mwa wachezaji wanaoonyesha ubora mkubwa katika kutengeneza nafasi za kufunga, akionyesha uwezo wa kulitazama vizuri lango la wapinzani na kuwaunganisha washambuliaji wa timu ya Simba ili waweze kupata mabao na kuiweka katika nafasi nzuri timu hiyo.

Kiungo huyo ametumia dakika 763 ndani ya michezo 10 kuhakikisha anapata hizo pasi saba.

Hussein Zakouani wa Young Africans anashika nafasi ya pili akiwa amefikisha pasi saidizi nne akitumia dakika 443 na michezo nane kuhakikisha anaonyesha ubora wake.

Ki Aziz wa Young Africans nae hayuko mbali amefanikiwa kuweka pasi saidizi tatu mapaka sasa akitumia dakika 224 ndani ya michezo minne.

Harun Chanongo wa timu ya Mashujaa ameweza kutoa pasi saidizi tatu akitumia dakika 289 ndani ya michezo sita.

Ani Elijah wa TRA United naye hayuko mbali ameweka pasi saidizi tatu akitumia dakika 567 ndani ya michezo tisa.

Rashid Chambo wa timu ya Namungo ameonyesha ubora wake katika kutoa pasi saidizi akitumia dakika 568 ndani ya michezo tisa.

Jeancy Mboma wa timu ya Singida Black Stars yupo vizuri akitumia dakika 752 kupata pasi tatu ndani ya msimu wa Ligi Kuu ya NBC msimu wa 2026/2027 hadi sasa.

Maxi Nzengeli, wa timu ya Young Africans ametumia dakika 881 ndani ya michezo 10 kutoa pasi saidizi tatu.

Kwa Gueye, kuongoza kwa tofauti ya pasi saidizi tatu dhidi ya anayemfuata ni ishara ya mchango wake mkubwa katika safu ya ushambuliaji ya timu ya Simba.

Hata hivyo, safari ya Ligi Kuu ya NBC bado ni ndefu na ushindani wa kuwania nafasi ya kinara wa ‘assists’ bado unaendelea.

Kiungo mshambuliaji wa klabu ya Simba, Elie Mpanzu amechaguliwa kuwa Mchezaji Bora wa mwezi Oktoba wa Ligi Kuu ya NBC msimu wa mwaka 2026/27, huku Steven Barker pia wa Simba akichaguliwa Kocha Bora wa ligi hiyo kwa mwezi huo.

Mpanzu alionesha kiwango kizuri chenye mwendelezo akiwashinda Iddi Selemani wa Azam FC na Nathaniel Chilambo wa Simba, alioingia nao fainali katika mchakato wa Tuzo za Mwezi uliofanywa na Kamati ya Tuzo za Shirikisho la Mpira wa Miguu Tanzania (TFF).

Mchezaji huyo alitoa mchango mkubwa kwa timu yake katika michezo mitatu ambayo ilicheza mwezi huo na kushinda yote, huku nyota huyo akifunga mabao matatu.

Kwa upande wa Barker aliyeingia fainali na Florent Ibenge wa Azam na Juma Mgunda wa Namungo, aliiongoza Simba kushinda michezo yote mitatu iliyocheza mwezi huo na kupanda kutoka nafasi ya pili hadi ya kwanza kwenye msimamo wa Ligi Kuu ya NBC.

Kamati pia imeteua mabao matatu bora, ambayo yatapigiwa kura na mashabiki ili kupata bao bora la mwezi Oktoba. Mabao hayo ni Hassan Mubiru (Azam v Mbeya City), Elie Mpanzu (Simba v Young Africans) na Selemani Bwenzi (Simba V Mashujaa).

Kamati ya Tuzo pia imemteua Meneja wa Uwanja wa Tanzanite Kwaraa, Jackson Mwendwa kuwa Meneja Bora wa Uwanja kwa mwezi Oktoba kutokana na kufanya vizuri katika menejimenti ya matukio ya michezo pamoja na masuala yanayohusu miundombinu uwanjani.

Pia Kamati ya Tuzo imemchagua Ramadhan Kalanje wa KMC kuwa Mchezaji Bora wa Mwezi Oktoba wa Ligi ya Championship ya NBC, akiwashinda Abdulkarim Segeja wa Kigamboni na Hamdani Ally wa Transit Camp alioingia nao fainali.

Kwa upande wa Kocha Bora wa ligi hiyo, kamati ilimchagua Awadh Juma wa Mtibwa Sugar aliyewashinda Habibu Kondo wa Bandari na Mohamed Muya wa KMC alioingia nao fainali katika mchakato huo.

MSHAMBULIAJI Anuary Jabiri wa Polisi Tanzania ameendelea kung’ara katika mbio za kuwania kiatu cha ufungaji bora wa Ligi Kuu ya NBC msimu wa 2026/2027, akiwa kinara wa orodha hiyo kwa sasa kwa kufikisha mabao saba.

Jabiri amekuwa na mwanzo mzuri wa msimu, akijitengenezea nafasi ya kuongoza orodha ya wafungaji akiwa amecheza michezo tisa sawa na dakika 889 amefanikiwa kuingia nyavuni mara saba.

Mshambuliaji wa Young Africans, Peter Shalulile, anafuata katika orodha hiyo baada ya kuingia wavuni mara sita katika dakika 670 alizocheza ndani ya michezo tisa.

Harbet Lukindo wa Namungo ndio anaefuata akiwa ametumia dakika 479 ndani ya michezo nane kuhakikisha anafunga mabao matano ndani ya msimu wa 2026/2027 wa Ligi Kuu ya NBC.

‘Mkongwe’ Obrey Chirwa wa Geita Gold amecheza dakika 702 kwenye michezo tisa ya Ligi Kuu ya NBC amefanikiwa kufunga mabao matano hadi sasa.

Clatous Chama, wa timu ya Simba mpaka sasa amefanikiwa ‘kuchana’ nyavu za wapinzani mara nne akitumia dakika 661 ndani ya michezo tisa ya ligi hiyo.

Elie Mpanzu wa timu ya Simba ametumia dakika 708 ndani ya michezo 10 akifanikiwa kufunga mara nne.

Anicet Oura wa Simba hayuko mbali na wenzake amefanikiwa kufunga mabao manne akitumia dakika 809 ndani ya michezo 10 ya ligi Kuu ya NBC.

Wachezaji wengine wenye idadi hiyo ni Ani Elijah wa TRA United nae amefanikiwa kufunga mabao manne akitumia dakika 567 katika michezo 9 aliyocheza.

Abdul Suleiman timu ya Azam amecheza michezo saba msimu huu akitumia dakika 384 kupata mabao manne ndani ya Ligi Kuu ya NBC.

Ushindani huo unaashiria vita kali ya kuwania kiatu cha ufungaji bora msimu huu, huku kila mshambuliaji akitazamiwa kutumia michezo inayofuata kuongeza idadi ya mabao na kujiimarisha katika orodha hiyo.

MCHUANO wa kuwania ufungaji bora katika Ligi ya Championship ya NBC msimu wa 2026/2027 inaendelea kushika kasi huku kila mchezaji akipambana kuhakikisha anafunga na kuisaidia timu yake.

Mshambuliaji Hamdani Ally wa Transit Camp anaongoza orodha hiyo ya wafungaji bora baada ya kuweka nyavuni mabao tisa ndani ya mizunguko nane ambayo timu yake imeshacheza hadi sasa akiwa ametumia dakika 720.

Ramadhani Kalanje wa KMC mwenye mabao nane ndio anaefuatia kwenye kinyang’anyiro hiki akiwa amefanikiwa kufunga mabao nane hadi sasa ndani ya mizunguko nane ya Ligi ya Championship ya NBC akicheza michezo yote na akitumia dakika 667.

Wachezaji watatu wanalingana kwa idadi ya mabao ambao ni Abuidy Khalebi wa Tabora United akitumia dakika 631, Abdulkarim Segeja wa Kigamboni United akitumia dakika 691 na Oscar Paulo wa Tanzania Prison  akitumia dakika 609 kila mmoja akiwa amefanikiwa kufunga mabao sita.

Ushindani huo unaifanya safari ya kuwania tuzo ya mfungaji bora kuwa ya kuvutia, huku kila mchezo ukiwa na nafasi ya kubadilisha mwenendo wa orodha hiyo.

Kwa upande mwingine, uwepo wa wachezaji watatu wenye mabao sita unaongeza ushindani katika nafasi za juu, huku wakisaka kuongeza idadi ya mabao yao katika michezo inayofuata.

Kadri ligi inavyoendelea, macho na matarajio ya mashabiki yataendelea kuelekezwa kwa washambuliaji hao, ambao wanapambana kuandika historia na kutwaa tuzo ya ufungaji bora wa NBC Championship msimu wa 2026/2027.

Ligi Kuu ya NBC msimu wa wa 2026/27 iliendelea kutimua ‘vumbi’ kwa timu za Simba, TRA United na Mashujaa baada ya kushinda michezo yao wakiwa uwanja wa nyumbani.

Katika mchezo wa mapema uliochezwa kwenye uwanja wa Sheikh Amri Abeid TRA United ilibuka na ushindi wa mabao 3-2 dhidi ya Fountain Gate.

TRA united ilipata mabao yake kupitia kwa Anni Elijah dakika ya 31, emmanuel Mwanengo dakika ya 38 na Amy Mapaka dakika ya 89 aliyehitimisha mabao ya TRA United.

Kwa upande wa Fountain Gate mabao yalifungwa na Hashimu Kindemile dakika ya 60 na Chukwunonye Obasi dakika ya 65 akiwapa Fountain mabao ya kufutia machozi.

Nayo Mashujaa ilitumia vyema uwanja wa nyumbani wa lake Tanganyika mkoani Kigoma baada ya kuibuka na ushindi wa bao 1-0 dhidi ya Pamba Jiji.

Crispin Ngushi ndiye aliyeiweka Mashujaa mbele kwa kufunga bao la pekee la mchezo dakika ya 20 lililodumu hadi filimbi ya mwisho na kuipa alama zote tatu huku Pamba jiji wakipoteza alama wakiwa ugenini.

Katika mchezo uliochezwa uwanja wa uhuru jijini Dar es saalam timu ya Simba iliibuka na ushindi wa mabao 3-2 dhidi ya Namungo katika pambano lililokuwa na ushindani mkubwa huku Simba ikiendelea kusalia kwenye kilele cha msimamo wa Ligi Kuu ya NBC.

Simba ilianza kwa kasi na kupata bao la kuongoza dakika ya nne kupitia Anicet Oura lakini Namungo ilisawazisha dakika ya 35 kupitia Raymond Lulendi kabla ya mshambuliaji huyo kuongeza bao la pili dakika ya 43 na kuifanya timu yake kwenda mapumziko ikiwa mbele kwa mabao 2-1.

Kipindi cha pili Simba ilirejea na kusawazisha dakika ya 79 kupitia Rushine De Reuck kwa mkwaju wa Penati na Anicet Oura kuhitimisha bao la tatu dakika ya 88 na kufanya Simba kuendeleza rekodi ya ushindi wa asilimia 100.