BODI ya Ligi Kuu Tanzania Septemba 5, 2025 imefanya kikao cha majadiliano na watendaji wakuu wa klabu za Ligi Kuu ya NBC ambapo mambo mbalimbali yanayohusu klabu hizo yalijadiliwa.

Akizungumza kwenye ufunguzi wa kikao hicho Mwenyekiti wa Bodi ya Ligi Kuu Tanzania Steven Mnguto amewataka watendaji wakuu wa klabu hizo kuyafanyia kazi watakayoyapata lakini pia kuwasisitiza juu ya umuhimu wao katika utendaji kazi wa kila siku wa klabu.

“Hii ni semina ambayo ukiwa mtulivu na ukiwa na nia ya kujifunza basi itakuwa ni semina ambayo itakusaidia katika kuendesha klabu yako na pia itakusaidia katika kuendesha mpira wetu kwa ujumla” alisema Mnguto.

Mada mbalimbali katika kikao hicho ziliwasilishwa na wakuu wa idara mbalimbali za bodi ya Ligi Kuu Tanzania.

Mada hizo ni udhibiti na usimamizi wa klabu, Rasilimali watu, usimamizi wa fedha, habari na mawasiliano, masoko na ubunifu, uendeshaji na usimamizi wa Ligi.

Akizungumza baada ya kikao hicho Afisa Mtendaji Mkuu amesema lengo la kikao hicho limefikiwa kwa asilimia mia moja kwani hii ni mara ya kwanza kufanya kikao cha namna hiyo na watendaji wakuu wa klabu.

Miongoni mwa washiriki wa kikao hicho Mtendaji Mkuu wa Fountain Gate Thabitha Kidawawa ameishukuru Bodi ya Ligi Kuu Tanzania kuwa na kikao cha namna hiyo na kuendelea kuzisaidia klabu katika changamoto mbalimbali zinazozikabili.

TUZO za Ligi Kuu ya NBC zimetangazwa huku timu ya Simba ikishinda tuzo mbili za mchezaji bora wa mwezi na kocha bora wa mwezi Agosti.

Mchezaji Jean Ahoua ameshinda tuzo ya mchezaji bora mwezi Agosti baada ya kufanikiwa kufunga bao moja na kutoa pasi tatu za mabao na kuifanya timu yake kuongoza msimamo baada ya kucheza michezo miwili bila kupoteza.

Kocha wa Simba Davids Fadlu ameshinda tuzo hiyo baada ya kuwazidi Patrick Aussems wa Singida Black Stars na Abdallah Mohamed wa mashujaa alioingia nao fainali katika mchakato huo.

Kwa upande wa tuzo ya Meneja Bora wa uwanja imeenda kwa Ashraf Omar wa uwanja wa Meja Isamuhyo unaomilikiwa na timu ya JKT Tanzania kutokana na kufanya vizuri katika menejimenti na miundombinu ya uwanja.

MICHEZO miwili ya Ligi Kuu ya NBC imechezwa leo Agosti 18, ambapo mapema saa 8:00 mchana Singida BS ikiwa ugenini mkoani Mbeya kwenye uwanja wa Sokoine imeibuka na ushindi wa mabao 3-1 dhidi ya wenyeji wao KenGold.

Matokeo ya Singida BS yaliwapandisha kileleni mwa msimamo wa Ligi Kuu ya NBC kwa muda kabla ya matokeo ya mchezo wa pili uliozikutanisha Simba dhidi ya Tabora UTD.

Simba iliwakaribisha Tabora UTD katika uwanja wa KMC saa 10:15 jioni na kumalizika kwa Simba kuibuka na ushindi wa mabao 3-0 yakifungwa na Che Malone, Valentino Mashaka Kusengama na Awesu Awesu.

Kwa matokeo hayo Simba imepanda kileleni mwa msimamo wa Ligi Kuu ya NBC ikitofautiana kwa idadi ya mabao na Singida BS na Mashujaa ambao wote wana alama tatu.

LADHA za Ligi Kuu ya NBC zinaendelea tena leo Agosti 18, kwa michezo miwili kuchezwa kwenye mikoa ya Mbeya na
Dar es salaam.

Mchezo wa mapema saa 8:00 mchana utawakutanisha mabingwa wa championship msimu uliopita KenGold dhidi ya Singida Black Stars kwenye uwanja wa Sokoine mkoani Mbeya.

Mchezo wa pili utachezwa saa 10:15 alasiri utazikutanisha Simba dhidi ya Tabora United kwenye uwanja wa KMC, Dar es salaam.

Mashujaa inaongoza msimamo wa Ligi Kuu ya NBC baada ya jana kuibuka na ushindi wa bao 1 dhidi ya Dodoma Jiji bao la kujifunga la Mlinda mlango Daniel Mgore.

Je ni nani kumshusha kileleni Mashujaa leo ? au msimamo utabaki kama ulivyo, majibu tutayapata baada ya dakika 90.

LIGI Kuu ya NBC imeendelea leo Agosti 17 kwa mchezo mmoja kuchezwa kati ya Mashujaa na Dodoma Jiji katika uwanja wa Lake Tanganyika mkoani Kigoma na kumalizika kwa Mashujaa kuibuka na ushindi wa bao 1.

Bao hilo la kwanza kwa msimu wa 2024/25 limepatikana baada ya golikipa wa Dodoma Daniel Mgore kujifunga.

Ushindi huu unaipandisha Mashujaa hadi kileleni mwa msimamo wa Ligi Kuu ya NBC 2024/2025 huku Dodoma Jiji ikishuka hadi nafasi ya mwisho kwenye msimamo.

Ligi hiyo itaendelea tena kesho Agosti 18, kwa michezo miwili mchezo wa mapema saa 8:00 mchana utazikutanisha KenGold dhidi ya Singida Black Stars kwenye uwanja wa Sokoine mkoani Mbeya huku mchezo wa pili saa 10:15 alasiri ukizikutanisha Simba dhidi ya Tabora UTD kwenye uwanja wa KMC, Dar es salaam.