SIMBA YAPANDA KILELENI, PHIRI, MAYELE WAENDELEZA VITA

TIMU ya Simba imemaliza mzunguko wa kwanza wa Ligi Kuu NBC kwa kicheko baada ya kuichapa Coastal Union mabao 3-0 katika Uwanja wa Mkwakwani, Tanga.

Kwa ushindi huo wa ugenini Simba imefikisha pointi 34 na kuwa vinara wakiwazidi mahasimu wao Yanga kwa pointi mbili na michezo miwili.

Mabao ya Moses Phiri dakika ya 53 na 61 na moja la Clatous Chama dakika ya 89 yameibakisha timu ya Coastal Union nafasi ya 13 ikiwa na point 12 baada ya michezo 14.

Mabao mawili ya Moses Phiri yamemfanya kufikisha mabao 10 sawa na Fiston Mayele wa Yanga na kuungana kuwa vinara wa mabao.

Pasi ya Clatous Chama iliyozaa bao la kwanza la Moses Phiri inamfanya kufikisha pasi saba na kuwa kinara wa pasi zilizozaa mabao.

Mchezo wa mapema Ruvu Shooting imeendelea kusota kwa kushindwa kupata matokeo katika michezo saba mfululizo baada ya kufungwa na timu ya Dodoma Jiji mabao 2-1.

Mabao ya Hassan Mwaterema na Salum Kipaga aliyejifunga yameisogeza Dodoma mpaka nafasi ya 12 kwa kufikisha pointi 15 huku bao pekee la Ruvu lililofungwa na Ally Bilali likiibakiza Ruvu nafasi ya 15 na alama 11 baada ya michezo 15.

TAARIFA KUTOKA BODI YA LIGI TANZANIA

KAMATI ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Disemba 1, 2022 ilipitia mwenendo na matukio mbalimbali ya Ligi na kufanya maamuzi yafuatayo;

 

Ligi Kuu ya NBC (NBCPL)

Mechi Namba 37: Mbeya City FC 1-1 Simba SC

Timu ya Simba imetozwa faini ya Sh. 1,000,000 (milioni moja) kwa kosa la baadhi ya wachezaji wake kuingia uwanjani kwa kupitia mlango usio rasmi kuelekea mchezo tajwa hapo juu uliofanyika kwenye uwanja wa Sokoine, Mbeya Novemba 23, 2022.

Simba walilazimisha baadhi ya wachezaji wao waruhusiwe kuingia uwanjani kupitia mlango wa kuingilia jukwaa la watu maalum na walipozuiwa na walinzi wa uwanjani (stewards), Simba walitumia nguvu kutimiza nia yao.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

 

Mchezaji wa timu ya Simba, Gadiel Michael amefungiwa michezo mitatu (3) na kutozwa faini ya Sh. 500,000 (laki tano) kwa kosa la kulazimisha kuingia uwanjani saa 4:25 asubuhi ya siku ya mchezo tajwa hapo juu kwa kile alichoeleza alitaka kukagua kiwanja.

Licha ya walinzi wa uwanja huo kumzuia Gadiel (ambaye alikuwa ameongozana na watu kadhaa waliovalia fulana zenye nembo ya klabu ya Simba), kwasababu haukuwa muda rasmi kwa ajili ya zoezi hilo na Simba hawakufanya mawasiliano yoyote na Kamishna wala Mratibu wa Mchezo wakieleza jambo hilo, Gadiel alitumia hila na kufanikiwa kuwakwepa walinzi hao kisha kuingia kiwanjani.

Mchezaji huyo alipoingia kiwanjani hakuonesha dalili yoyote ya kukagua eneo la kuchezea na badala yake alionekana kwenda moja kwa moja hadi eneo la katikati ya kiwanja na kumwaga vitu vyenye asili ya unga.

Adhabu hii ni kwa uzingativu wa Kanuni 41:5(5.5) ya Ligi Kuu kuhusu udhibiti kwa Wachezaji.

 

Kamati imeikumbusha Timu ya Mbeya City kuhakikisha viongozi wake waliofungiwa wanatekeleza adhabu zao kikamilifu ikiwemo kutojihusisha na masuala ya timu hiyo hadi pale adhabu zao zitakapomalizika.

Katika mchezo tajwa hapo juu, kiongozi wa Mbeya City, Frank Mfundo ambaye anatumikia adhabu ya kufungiwa, alionekana kufanya kazi za klabu hadi pale walipomuondoa kwa haraka baada ya kuelezwa juu ya jambo.

Klabu ina wajibu wa kuhakikisha viongozi na wachezaji wao walioadhibiwa wanatekeleza masharti ya adhabu zao kama ilivyoainishwa kwenye Kanuni ya 47:5 ya Ligi Kuu kuhusu Udhibiti kwa Klabu.

 

Timu ya Mbeya City imetozwa faini ya Sh. 500,000 (laki tano) kwa kosa la baadhi ya viongozi wake kumtolea lugha chafu Mratibu Msaidizi wa Mchezo tajwa hapo, wakilazimisha kuingia katika eneo la kimashindano mara baada ya mchezo kumalizika na wakati makochwa wa timu zote mbili wakiendelea kuhojiwa na Azam TV.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

Mchezo tajwa hapo juu ulikuwa na mapungufu katika uamuzi hivyo Kamati imepeleka shauri la waamuzi wa mchezo huo kwenye Kamati ya Waamuzi ya Shirikisho la Mpira wa Miguu, TFF kwa ajili kujadiliwa na kutolewa ushauri wa kitaalamu kabla ya kufanyika kwa maamuzi.

 

Mechi Namba 38: Ihefu SC 2-1 Young African SC

Kocha wa timu ya Young African, Nasreddine Nabi amefungiwa michezo mitatu na kutozwa faini ya Sh. 500,000 (laki tano) kwa kosa la kuwashambulia kwa maneno mwamuzi wa kati na mwamuzi wa akiba wa mchezo tajwa hapo juu.

Kocha Nabi aliendelea kufanya kitendo hicho hata baada ya kuonywa kwa kadi ya manjano.

Adhabu hii ni kwa uzingativu wa Kanuni ya 42:2(2.1) ya Ligi Kuu kuhusu Udhibiti kwa Makocha.

 

Mechi Namba 106: Ruvu Shooting FC 0-1 Singida Big Stars FC

Klabu ya Ruvu Shooting imetozwa faini ya Sh. 500,000 (laki tano) kwa kosa la kuchelewa kuwasili uwanjani kuelekea mchezo tajwa hapo juu.

Ruvu Shooting waliwasili uwanjani saa 8:42 mchana badala ya saa 8:30 mchana kama ilivyoainishwa kwenye kanuni ya 17:15 ya Ligi Kuu kuhusu Taratibu za Mchezo.

Adhabu hii ni kwa uzingativu wa Kanuni ya 17:60 ya Ligi Kuu kuhusu Taratibu za Mchezo.

 

Mechi Namba 109: Polisi Tanzania FC 1-3 Simba SC

Klabu ya Polisi Tanzania imetozwa faini ya Sh. 500,000 (laki tano) kwa kosa la kuingia uwanjani kwa kupitia mlango usio rasmi kuelekea mchezo tajwa hapo juu uliofanyika kwenye uwanja wa Ushirika uliopo mjini Moshi mkoani Kilimanjaro, Novemba 27, 2022.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

 

Mechi Namba 110: Azam FC 3-2 Coastal Union FC

Mchezaji wa klabu ya Coastal Union, Maabadi Maabadi amefungiwa michezo mitatu (3) na kutozwa faini ya Sh. 500,000 (laki tano) kwa kosa la kumshambulia mwamuzi wa kati wa mchezo tajwa hapo juu kwa kumrushia chupa ya maji na baadaye kiatu.

Mchezaji huyo ambaye alikuwa kwenye benchi baada ya kufanyiwa mabadiliko, alionekana akiingia kiwanjani na kumrushia chupa mwamuzi wa kati wakati mchezo ukiendelea kisha kwenda kumshambulia mwamuzi huyo kwa kutumia kiatu baada ya mchezo kumalizika.

Adhabu hii ni kwa uzingativu wa Kanuni ya 41:5(5.3) ya Ligi Kuu kuhusu Udhibiti kwa Wachezaji.

 

Klabu ya Coastal Union imetozwa faini ya Sh. 1,000,000 (milioni moja) kwa kosa la baadhi ya wachezaji wake na viongozi wa benchi la ufundi kurusha chupa za maji kiwanjani wakati mchezo ukiendelea.

Adhabu hii ni kwa uzingativu wa Kanuni ya 47:1 ya Ligi Kuu kuhusu Udhibiti kwa Klabu.

 

Klabu ya Azam imetozwa faini ya Sh. 1,000,000 (milioni moja) kwa kosa la shabiki wake aliyekuwa ameketi kwenye jukwaa la watu maalum, kurusha chupa ya maji kwa hasira katika eneo hilo mara baada ya timu ya Coastal Union kupata bao la kusawazisha katika mchezo tajwa hapo juu uliomalizika kwa Azam kupata ushindi wa mabao 3-2.

Adhabu hii ni kwa uzingativu wa Kanuni ya 47:1 ya Ligi Kuu kuhusu Udhibiti kwa Klabu.

 

Kamati imepeleka shauri la waamuzi wa mchezo tajwa hapo juu kwenye Kamati ya Waamuzi ya Shirikisho la Mpira wa Miguu, TFF kwa ajili kujadiliwa na kutolewa ushauri wa kitaalamu kabla ya kufanyika kwa maamuzi.

 

Ligi ya Championship

Mechi Namba 86: Pan Africans FC 2-0 Biashara United FC

Klabu ya Pan Africans imepewa onyo kwa kosa la kuwakilishwa na maafisa pungufu kwenye kikao cha maandalizi ya mchezo (MCM).

Pan Africans iliwakilishwa na maafisa wanne (4) badala ya watano (5) walioainishwa kikanuni.

Adhabu hii ni kwa uzingativu wa Kanuni ya 17:2(2.2) na 17:60 ya Championship kuhusu Taratibu za Mchezo.

 

Imetolewa na;

Idara ya Habari na Mawasiliano

Bodi ya Ligi Kuu Tanzania (TPLB)

Disemba 2, 2022

 

KALI ONGALA AENDELEZA REKODI, SIMBA YANGURUMA MOSHI

Timu ya Azam chini ya kocha Kali Ongala imepata ushindi wa saba mfululizo katika michezo ya Ligi Kuu NBC baada ya kuifunga Coastal Union ya Tanga mabao 3-2.

Ushindi huo unaifanya Azam kukalia nafasi ya pili katika msimamo wa Ligi kwa kufikisha pointi 32 sawa na vinara Yanga huku wakizidiwa kwa tofauti ya mabao tisa.

Azam inaendelea kuonyesha ubabe katika michezo ya nyumbani ikipata ushindi kwenye michezo saba na kuwa kinara kwa timu zilizoshinda mechi nyingi katika uwanja wake.

Uwanja wa Ushirika mkoani Kilimanjaro Moses Phiri amefunga mabao mawili akiisaidia timu yake ya Simba kupata ushindi wa mabao 3-1 dhidi ya Polisi Tanzania.

Mabao hayo ya Moses Phiri yanamfanya kufikisha mabao nane na kushika nafasi ya pili nyuma ya Fiston Mayele wa timu ya Yanga mwenye mabao 10.

Bao lingine la Simba katika mchezo huo limefungwa na John Bocco aliyefikisha mabao manne katika msimamo wa wafungaji huku bao pekee la timu ya Polisi likifungwa na Zuberi Mbogo kwenye dakika za nyongeza kipindi cha pili.

YANGA YAENDELEZA REKODI

Timu ya Yanga imeendeleza rekodi yake ya ushindi katika mechi za ndani ya Nchi kwa kufikisha mechi 49 bila kupoteza baada ya kuifunga timu ya Mbeya City mabao 2-0.

Mabao yote ya Yanga yamefungwa na Fiston Mayele aliyetimiza idadi ya mabao 10 baada ya kucheza michezo 12 huku akiwa na mabao 19 katika michezo yote aliyocheza msimu huu pamoja na ile ya kimataifa.

Matokeo hayo yanaifanya Yanga kufikisha pointi 32 kileleni wakiwa na mechi moja mkononi watakayocheza na timu ya Ihefu Novemba 29 kwenye uwanja wa Highland Estates.

Timu ya Ruvu Shooting ilikua mwenyeji wa Singida Big Stars majira ya saa 10:00 alasiri na kupoteza kwa bao 1-0 lililofungwa na Frank Zakaria likiwafanya Singida kubaki nafasi ya nne katika msimamo wakiwa na pointi 24.

Ruvu inaendelea kusalia na pointi 11 huku ikiwa na pointi tatu zaidi ya timu inayokamata nafasi ya mwisho katika msimamo wa Ligi Ihefu SC.

Timu ya Namungo imepata ushindi wa tano msimu huu na kuifanya timu hio kufikisha pointi 18 na kuendelea kubaki nafasi ya nane katika msimamo wa Ligi Kuu NBC.

Ushindi huo ulihakikishwa dakika ya 82 kwa bao la Abdulmalick Hamza likiwa bao la 11 kwa timu ya Namungo huku mabao sita kati ya hayo yakifungwa na Reliants Lusajo.

TAARIFA KUTOKA BODI YA LIGI KUU TANZANIA

KAMATI ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Novemba 25, 2022 ilipitia mwenendo na matukio mbalimbali ya Ligi na kufanya maamuzi yafuatayo;

 

Ligi Kuu ya NBC (NBCPL)

Mechi Namba 53: Singida Big Stars FC 1-1 Simba SC

Mchezaji wa timu ya Singida Big Stars, Shafiq Batambuze amefungiwa michezo mitatu (3) na kutozwa faini ya Sh. 500,000 (laki tano) kwa kosa la kuingia kiwanjani kuanza kupasha moto misuli dakika 10 kabla ya muda ulioainishwa kwenye ratiba ya matukio ya mchezo.

Mchezaji huyo alipinga maelekezo ya Mratibu wa Mchezo (GC) na Kamishna wa Mchezo waliomtaka arejee chumbani hadi muda uliopangwa utakapowadia. Akiwa kiwanjani, Shafiq Batambuze alionekana kumwaga vitu kwenye majani jambo lililoashiria imani za kishirikina.

Adhabu hii ni kwa uzingativu wa Kanuni 41:5(5.5) ya Ligi Kuu kuhusu udhibiti kwa Wachezaji.

 

Kamati imewafungia michezo mitatu na kuwatoza faini ya Sh. 1,000,00 (milioni moja) kila mmoja, Kocha Msaidizi wa Singida Big Stars, Mathias Lule na Kocha wa Makipa wa timu hiyo, Steven Kiagundu kwa kosa la kumuamuru Shafiq Batambuze aendelee kusalia kiwanjani hata pale mchezaji huyo alipojaribu kuondoka.

Adhabu hii ni kwa uzingativu wa Kanuni ya 45:2(2.4) ya Ligi Kuu kuhusu Udhibiti kwa Makocha.

 

Timu ya Singida Big Stars imetozwa faini ya Sh. 500,000 (laki tano) kwa kosa la kushindwa kuhudhuria Mkutano wa Wanahabari uliopangwa kufanyika Novemba 8, 2022 kwenye ukumbi wa Benki ya NBC tawi la Singida, kuelekea mchezo tajwa hapo juu.

Adhabu hii ni kwa uzingativu wa Kanuni ya 17:(56 & 60) ya Ligi Kuu kuhusu Taratibu za Mchezo.

 

 

Mechi Namba 94: Ihefu SC 1-2 Polisi Tanzania FC

Kamati imemfungia miezi mitatu (3) na kumtoza faini ya Sh. 500,000 (laki tano), Afisa Usalama wa klabu ya Polisi, Nelson Ngonyani kwa kosa la kumshambulia kwa matusi Mratibu wa Mchezo tajwa hapo juu, akipinga maelekezo halali yanayohusu kufuata taratibu za mchezo.

Afisa Usalama huyo aliendelea kwa kumtaka Mratibu wa Mchezo husika akashtaki kwenye mamlaka yoyote kwani anajua hakuna anayeweza kumfanya chochote.

Adhabu hii ni kwa uzingativu wa Kanuni ya 46:3 ya Ligi Kuu kuhusu Udhibiti kwa Viongozi.

 

Mechi Namba 104: Dodoma Jiji FC 0-2 Young Africans SC

Timu ya Young Africans  imepewa onyo kwa kosa la kuchelewa kuwasili kwenye Mkutano wa Wanahabari (Pre-Match Press Conference) kwa dakika 35.

Kocha Mkuu na nahodha au mchezaji mwenye ushawishi kikosini wanapaswa kushiriki mkutano wa Wanahabari siku moja kabla ya mchezo na katika muda uliopangwa kwenye ratiba ya mikutano hiyo.

Yanga walifika ukumbini saa 7:05 mchana badala ya saa 6:30 mchana.

Adhabu hii ni kwa uzingativu wa Kanuni ya 17:(56 & 60) ya Ligi Kuu kuhusu Taratibu za Mchezo.

 

Kamati imeionya timu ya Dodoma Jiji kwa kosa la viongozi wake kuingia katika chumba cha kuvalia wachezaji wa timu hiyo ndani ya muda wa kikanuni wa mchezo.

Viongozi hao walishuka kutoka jukwaani wakati wa mapumziko na kuingia ndani ya chumba hicho, kitendo ambacho ni kinyume na matakwa ya Kanuni ya 17:17 ya Ligi Kuu kuhusu Taratibu za Mchezo.

Adhabu hii ni kwa uzingativu wa Kanuni ya 17:60 ya Ligi Kuu kuhusu Taratibu za Mchezo.

 

MUHIMU

Kamati ya Uendeshaji na Usimamizi wa Ligi imepeleka mashauri yote ya waamuzi kwenye Kamati ya Waamuzi ya TFF kwa ajili ya uchambuzi wa kitaalamu wa maamuzi yote yenye utata yaliyofanyika kwenye michezo ya Ligi Kuu ya NBC, kabla ya kurejeshwa kwa ajili ya kujadiliwa na kutolewa maamuzi na Kamati ya Uendeshaji na Usimamizi wa Ligi.

Ligi ya Championship

Mechi Namba 65: Biashara United FC 2-1 Kitayosce FC

Timu ya Biashara United imetozwa faini ya Sh. 500,000 (laki tano) kwa kosa la mashabiki wake kutoa vitisho na lugha ya matusi kwa waamuzi wa mchezo tajwa hapo juu kabla ya kuanza kwa mchezo.

Mashabiki hao waliendelea kufanya vitendo visivyo vya kimchezo kwa kurusha mawe juu ya paa la chumba cha waamuzi wakitoa kauli za vitisho kuwa waamuzi hao wasingetoka salama uwanjani hapo kama timu yao isingepata matokeo ya ushindi katika mchezo huo.

Adhabu hii ni kwa uzingativu wa Kanuni ya 47 ya Championship kuhusu Udhibiti kwa Klabu.

 

MUHIMU

Kamati imeitaka klabu ya Biashara United kuhakikisha vitendo vya namna hii havijirudii tena kwenye uwanja wao kwani vikijirudia, hatua kali zaidi za kikanuni zitachukuliwa ikiwemo kuzuia mashabiki kuingia uwanjani katika michezo yake yote au kuufungia uwanja Karume kutumika kwa michezo ya Ligi.

 

Mechi Namba 72: Gwambina FC 2-4 Ndanda FC

Klabu ya Gwambina imetozwa faini ya Sh. 500,000 (laki tano) kwa kosa la kuchelewa kufika uwanjani kwa dakika 38.

Gwambina ilifika kwenye uwanja wa Nyamagana saa 9:08 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 17:60 ya Championship kuhusu Udhibiti kwa Klabu.

 

Mechi Namba 73: Gwambina FC 2-1 Mashujaa FC

Klabu ya Gwambina imetozwa faini ya Sh. 500,000 (laki tano) kwa kosa la kuchelewa kufika uwanjani kwa dakika 75.

Gwambina ilifika kwenye uwanja wa Nyamagana saa 9:45 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 17:60 ya Championship kuhusu Taratibu za Mchezo.

Mechi Namba 76: Mbuni FC 0-1 JKT Tanzania FC

Klabu ya Mbuni imetozwa faini ya Sh. 500,000 (laki tano) kwa kosa la mashabiki wake wakiongozwa na Katibu wa klabu hiyo, Michael Yoen kuwashambulia waamuzi baada ya kumalizika kwa mchezo tajwa hapo juu kwenye uwanja wa Aga Khan jijini Arusha.

Adhabu hiyo ni kwa uzingativu wa Kanuni ya 47 ya Championship kuhusu Udhibiti kwa Klabu.

 

Kamati imemfungia miezi sita (6) na kumtoza faini ya Sh. 2,000,000 (milioni mbili) katibu wa Mbuni FC, Michael Yoen kwa kosa la kuongoza mashabiki kuwashambulia waamuzi na kuendelea kuwafuatilia waamuzi hao hadi hotelini walikofikia.

Adhabu hiyo ni kwa uzingativu wa Kanuni ya 46:3 ya Championship kuhusu Udhibiti kwa Viongozi.

 

Kamati imempongeza Afisa Usalama wa Chama cha Mpira wa miguu mkoa wa Arusha (ARFA), Mike Warioba kwa juhudi zake za kuhakikisha waamuzi na Kamishna wa mchezo huo hawapati madhara zaidi kutokana na vurugu za mashabiki hao.

Mike Warioba aliwaondoa maafisa hao hotelini na kwenda kuwapa hifadhi katika kituo kikuu cha polisi Arusha kabla ya kuwatafutia usafiri wa kuwaondoa jijini Arusha usiku huo huo wa Novemba 19, 2022.

 

First League

Mechi Namba 14B: Stand United FC 2-0 Kasulu FC

Klabu ya Kasulu imepewa onyo kali kwa kosa la kuwakilishwa na maafisa pungufu kwenye kikao cha maandalizi ya mchezo (MCM).

Kasulu iliwakilishwa na maafisa wawili (2) badala ya watano (5) walioainishwa kikanuni.

Adhabu hii ni kwa uzingativu wa Kanuni ya 18:2(2.2) na 18:60 ya First League kuhusu Taratibu za Mchezo.

 

Mechi Namba 19B: Kasulu FC 1-3 Rhino Rangers FC

Klabu ya Kasulu imepewa onyo kali kwa kosa la kuchelewa kufika uwanjani kwa dakika 80.

Kasulu ilifika kwenye uwanja wa Nyamagana saa 9:50 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 18:(15 & 60) ya First League kuhusu Taratibu za Mchezo.

 

Kuhusu Klabu ya Njombe Mji

Bodi ya Ligi imepokea barua ya klabu ya Njombe Mji ya mkoani Njombe wakiomba kujitoa kushiriki First League msimu huu wa 2022/2023 baada ya na kukumbwa na matatizo ya kifedha, hali iliyosababisha timu hiyo ishindwe kumudu gharama za kushiriki ligi hiyo.

Kutokana na ombi hilo, Klabu ya Njombe Mji haitoendelea kushiriki First League msimu wa 2022/2023, imeshushwa daraja na kufungiwa kucheza Ligi kwa misimu miwili (2).

Adhabu hii ni kwa mujibu wa Kanuni ya 31:4(4.1) ya First League kuhusu Kujitoa.

Kwasababu idadi ya michezo ambayo Njombe Mji imecheza hadi kujitoa kwake haizidi nusu ya michezo yote, matokeo ya michezo yote iliyocheza yamefutwa kwa mujibu wa Kanuni ya 31:4(4.3) ya First League kuhusu Kujitoa.

 

Imetolewa na;

Idara ya Habari na Mawasiliano

Bodi ya Ligi Kuu Tanzania (TPLB)

Novemba 26, 2022

SIMBA YAENDELEA KUSOTA UGENINI

TIMU ya Simba imeendeleza rekodi mbaya katika Ligi Kuu NBC inapocheza michezo ya ugenini baada ya kushindwa kuondoka na pointi tatu katika uwanja wa Sokoine Mbeya dhidi ya timu ya Mbeya City na kulazimishwa sare ya bao moja.

Simba wamecheza mechi sita ugenini na kufanikiwa kushinda mechi mbili pekee, kutoka sare tatu na kupoteza moja huku wapinzani wao wa jadi timu ya Yanga ikishinda mechi sita kati ya sita ilizocheza ugenini.

Mabao ya mchezo wa leo yamefungwa na Mzamiru Yassin dakika ya 15 kwa pasi ya John Bocco aliehusika katika mabao manne mpaka sasa katika mechi mbili mfululizo zilizopita huku bao la Mbeya City likifungwa na Tariq Seif dakika ya 79 kwa pasi ya Awadh Juma.

Baada ya kufanikiwa kupata alama moja timu ta Mbeya City imepanda mpaka nafasi ya sita katika msimamo wa Ligi wakizidiwa alama mbili na timu ya Mtibwa Sugar pamoja na Singida Big Stars wenye pointi 21 huku simba ikisalia nafasi ya tatu na pointi 28.

Mkoani Singida timu ya Singida Big Stars baada ya kufungwa mabao 4-1 na timu ya Yanga mchezo wa raundi ya 12 leo imefanikiwa kupata ushindi wa bao 1-0 dhidi ya KMC ya Dar es Salaam katika uwanja wa CCM Liti.

Singida ilijihakikishia ushindi kipindi cha kwanza dakika ya 40 kupitia kwa mchezaji wa zamani wa timu ya Simba aliewahi kuwa mfungaji bora wa Ligi Kuu kwa misimu miwili Meddie Kagere.

Ushindi wa leo unaifanya Singida kuendelea kushika nafasi ya nne wakifikisha pointi 21 na mchezo mmoja mkononi huku KMC ikisalia na pointi 14 katika nafasi ya 10 kwenye msimamo wa Ligi Kuu NBC.

Michezo miwili ya leo iliyopigwa mikoa ya Singida na Mbeya imekamilisha idadi ya michezo 100 tangu kuanza kwa msimu mpya wa Ligi Kuu NBC.

MAYELE AMPIKU SABILO UFUNGAJI BORA

BAADA ya kufunga mabao matatu ‘Hat-Trick’ katika mchezo uliopita wa Ligi Kuu NBC dhidi ya Singida Big Stars mchezaji wa timu ya Yanga Fiston Mayele ameendelea kuwa mwiba kwa magolikipa baada ya kufunga magoli mawili leo dhidi ya Dodoma Jiji.

Mabao hayo yameisaidia timu yake kuibuka na ushindi wa 2-0 na kuishusha timu ya Azam katika nafasi ya kwanza kwa tofauti ya mabao nane kwenye msimamo wa Ligi kwa kufikisha pointi 29 wakiwa na mechi tatu mkononi.

Hii ni mara ya kwanza kwa Fiston Mayele aliyemaliza nafasi ya pili msimu uliopita nyuma ya George Mpole katika wafungaji kuongoza katika msimamo wa vinara wa mabao msimu huu.

Mchezo huo umeshuhudia Tuisila Kisinda na Dennis Nkane wakitoa pasi za mabao zao za kwanza tangu kuanza kwa msimu huu na mechi ya pili kwa golikipa Abutwalib Mshery bila kuruhusu bao.

Ligi kuu NBC itaendelea tena kesho Novemba 23 kwa michezo miwili kati ya Singida Big Stars na KMC uwanja wa Liti Singida majira ya saa 8:00 mchana huku Mbeya City watakua wenyeji wa Simba uwanja wa Sokoine mkoani Mbeya saa 10:00 alasiri.

MTIBWA YAISHUSHA MBEYA CITY, PRISONS HOI

TIMU ya Mtibwa Sugar imefanikiwa kuishusha timu ya Mbeya City katika nafasi nne za juu katika msimamo wa Ligi baada ya kuifunga Polisi Tanzania bao 2-1.

Polisi Tanzania ilikua ya kwanza kuandika bao kupitia kwa Ambrose Awio dakika ya 35 huku mabao ya Mtibwa yakifungwa na Ismail Mhesa dakika 45 kabla ya Onesmo Mayaya kufunga la pili dakika ya 48.

Huu ni mchezo wa pili mfululizo kwa Mtibwa kupata ushindi nyumbani ikiwa ni baada ya kuifunga timu ya Coastal Union idadi hiyo ya mabao katika raundi ya 12.

Ushindi huo unaisogeza Mtibwa nafasi ya nne katika msimamo wa Ligi Kuu NBC kwa kufikisha pointi 21 ikiizidi Mbeya City kwa pointi tatu na mchezo mmoja.

Mkoani Mbeya Tanzania Prisons imeendelea kusuasua baada ya kupoteza mechi dhidi ya Kagera Sugar kwa bao 1-0 lililofungwa na Meshack Mwamita dakika ya 85 kwa shuti la mbali lililomshinda golikipa Edward Mwakyusa.

Timu ya Tanzania Prisons imepoteza mchezo wa tatu mfululizo iliyocheza nyumbani kwa bao 1-0 dhidi ya Kagera Sugar huku wakishuka mpaka nafasi ya 11 katika msimamo wa Ligi Kuu NBC.

Bada ya ushindi huo Kagera Sugar imepanda hadi nafasi ya tisa kwa kufikisha pointi 15 bila mchezo wowote mkononi.

AZAM YAENDELEA KUWA TISHIO

TIMU ya Azam imeendelea kuwa na mwenendo mzuri wa matokeo katika Ligi Kuu NBC baada ya kuifunga timu ya Namungo bao moja ugenini na kufanikiwa kukusanya alama zote tatu zinazowapeleka nafasi ya kwanza katika msimamo.

Bao hilo limefungwa na beki Edward Manyama dakika ya 29 na kuendeleza rekodi bora ya kutokupoteza mchezo wowote kwa kaimu kocha mkuu wa timu hiyo Kali Ongala.

Matokeo hayo yanaifanya Namungo kusalia na pointi 15 katika nafasi ya tisa huku wakiwa na ukame wa kushinda katika michezo minne mfululizo.

Mkoani Mbeya mchezo wa mapema timu ya Mbeya City imetoka suluhu dhidi ya Geita Gold matokeo yanayofanya timu hizo kulingana Pointi 18 kila moja huku Mbeya City ikiwa na uwiano mzuri wa mabao.

Mchezo mwingine uliopigwa uwanja wa Highland Estates timu ya Ihefu imepata ushindi wa pili msimu huu baada ya kuifunga timu ya Coastal Union mabao 2-1.

Mabao ya Ihefu yamefungwa na Never Tigere dakika ya 42 na Niko Wadada dakika ya 46 huku bao pekee la Coastal likifungwa na Mbarack Amza dakika ya 38 linalomfanya kufikisha mabao matano katika orodha ya wafungaji msimu huu.

Pamoja na ushindi huo Ihefu wanaendelea kusalia nafasi ya mwisho katika msimamo wa Ligi Kuu wakiwa na alama nane baada ya michezo 12.