Mshambuliaji wa Polisi Tanzania, Anuary Jabir, ameendelea kung’ara katika mbio za ufungaji bora wa Ligi Kuu ya NBC msimu wa 2026/2027, akiongoza orodha ya wafungaji kwa mabao saba, akiwazidi washindani wake wanaofuatia kwa tofauti ya mabao matatu.

Jabir anaongoza katika orodha hiyo akiwa amecheza michezo tisa sawa na dakika 742 ndani ya msimu wa 2026/2027 wa Ligi Kuu ya NBC.

Wachezaji sita wa timu mbalimbali wamefuatia kwenye orodha hiyo kwa kufungana kwa mabao manne kila mmoja, hali inayofanya ushindani wa kuwania nafasi za juu katika orodha ya wafungaji kuwa mkubwa baada ya mizunguko tisa ya Ligi hiyo.

Peter Shalulile wa Young Africans hayuko mbali akifanikiwa kufunga mabao manne ndani ya dakika 507 za Ligi Kuu ya NBC saw ana michezo saba.

Elie Mpanzu na Clatous Chama wa Simba kila mmoja anayo mabao manne Mpanzu akitumia michezo nane sawa na dakika 528 huku Chama akitumia dakika 567 kwenye michezo saba kuhakikisha anapata mabao manne.

Herbert Lukindo wa timu ya Namungo ndio anafuata akicheza michezo sita sawa na dakika 336 amefanikiwa kufunga mabao manne pia ndani ya msimu huu wa Ligi Kuu ya NBC.

Obrey Chirwa wa timu ya Geita Gold amecheza dakika 536 sawa na michezo saba akiingia nyavuni mara nne na kuisaidia timu yake kupata alama.

Abdul Suleiman wa timu ya Azam naye kaweka nyavuni mabao manne mpaka sasa akicheza dakika 297 ndani ya michezo mitano ya Ligi Kuu ya NBC.

Safari bado ni ndefu huku kila mchezo ukiwa na nafasi ya kubadilisha mwelekeo wa ushindani huo. Swali kubwa linabaki kuwa je, Anuary Jabir ataendelea kutawala orodha hiyo au washindani wake wataongeza kasi na kumkaribia? Jibu tutalipata kadri utamu wa Ligi Kuu ya NBC unavyozidi kunoga.

Kiungo mshambuliaji wa timu ya Simba na raia wa Zambia, Clatous Chama, anaongoza orodha ya wachezaji waliofunga mabao mengi kwa kutumia mguu wa kulia katika msimu wa 2026/27 wa Ligi Kuu ya NBC hadi sasa, akiwa amefunga mabao manne ndani mizunguko nane ya ligi hiyo.

Chama anaendelea kuonyesha uwezo wake wa kutumia mguu wa kulia katika kumalizia mashambulizi, akiwazidi wachezaji wengine wanaofuatia katika orodha hiyo ambao kila mmoja amefunga mabao matatu.

Wachezaji hao ni Maxi Nzengeli (Young Africans), Herbet Lukindo (Namungo), Maabad Maabad (Coastal Union), Abdul Suleiman (Azam) na Anuary Jabir (Polisi Tanzania), ambao wanashika nafasi zinazofuata kwa kufunga mabao matatu kila mmoja kwa kutumia mguu wa kulia.

Ushindani huo unaonyesha namna wachezaji ndani ya Ligi Kuu ya NBC wanavyotumia uwezo wao wa kiufundi na umaliziaji katika kutikisa nyavu za wapinzani wao na kusaidia timu zao kufikia malengo waliyojiwekea katika ligi hiyo.

Kwa Chama kuongoza orodha hii ni ishara nyingine ya mchango wake katika safu ya ushambuliaji ya timu ya Simba ambayo inaongoza msimamo wa Ligi Kuu ya NBC akiwa na alama 24 baada ya kushinda michezo yote nane hadi sasa, huku ushindani ukiendelea kuwa mkali kadiri ladha za Ligi Kuu ya NBC msimu wa 2026/27 zinavyoendelea kuwa tamu.

LIGI Kuu ya NBC inaendelea kushuhudia ushindani huku macho ya mashabiki wa soka yakielekezwa katika Uwanja wa Meja Jenerali Isamuhyo mkoani Dar es Salaam, ambako timu ya JKT Tanzania itakuwa mwenyeji wa Mbeya City katika mchezo unaotarajiwa kupigwa saa 1:00 usiku.

Mchezo huo unawakutanisha wapinzani wanaotofautiana kwa nafasi moja tu kwenye msimamo wa ligi, ambapo Mbeya City inashika nafasi ya nane huku JKT Tanzania ikiwa nafasi ya tisa.

Hali hiyo inaufanya mchezo huu kuwa mgumu na muhimu kwa timu zote mbili katika harakati za kuboresha nafasi zao walizopo kwenye msimamo.
JKT kucheza uwanja wa nyumbani ni nafasi ya kutumia faida ya uwanja wao kujipatia alama muhimu mbele ya mashabiki wao.

Wanajeshi hao wanahitaji kuonyesha nidhamu, umakini na uwezo wa kutumia nafasi wanazozitengeneza ili kupata matokeo yatakayowapa nafasi ya kuisogelea Mbeya City kwenye msimamo.

Kwa upande wa Mbeya City, safari ya kwenda Isamuhyo ina changamoto yake, lakini pia ni fursa ya kuthibitisha ushindani wao dhidi ya timu wanayoizidi kwa nafasi moja pekee kwenye msimamo.

Matokeo chanya yatawapa nafasi ya kuimarisha nafasi yao na kwenda pazuri zaidi na kuendeleza ushindani katika Ligi Kuu ya NBC na alama tatu thamani yake ni zaidi ya ushindi.

Kwa timu ya JKT Tanzania ushindi unaweza kuwa hatua muhimu ya kuipiku Mbeya City, huku wageni hao wakitafuta matokeo yatakayowasaidia kupanda nafasi za juu zaidi kwenye msimamo wa ligi.

Hata hivyo nafasi za timu kwenye msimamo pekee haziamui matokeo ya mchezo, Nidhamu ya kiufundi, umakini katika safu ya ulinzi na ufanisi wa washambuliaji wa timu hizo vinaweza kuwa na mchango mkubwa katika kuamua hatma ya dakika 90 itakavyokuwa.

KAGERA Sugar na Polisi Tanzania zimetoka sare ya bao 1-1 katika mchezo wa Ligi Kuu ya NBC uliopigwa jana kwenye Uwanja wa Kaitaba, huku bao la dakika ya 90 la Keneth Kunambi likiivusha Polisi Tanzania na pointi moja.

Kagera Sugar walionekana kuwa karibu na ushindi baada ya Nyenyezi Shabani kuifungia timu hiyo bao la kuongoza dakika ya 75, akiiweka katika nafasi nzuri ya kumaliza mchezo ikiwa na ushindi mbele ya mashabiki wake.

Hata hivyo, Polisi Tanzania hawakukata tamaa, wakisubiri hadi dakika ya 90 ambapo mchezaji wao Keneth Kunambi alifanikiwa kusawazisha matokeo na kuirejesha timu yake mchezoni.

Bao hilo la dakika za mwisho lilibadilisha mwelekeo wa mchezo, huku Kagera Sugar ikikosa nafasi ya kuondoka na pointi zote tatu katika uwanja wake wa nyumbani.

Matokeo hayo yanaifanya kila timu kuondoka na alama moja, baada ya pambano lililoshuhudia mabao yakipatikana katika dakika za mwisho wa mchezo na mchezaji wa Kagera Sugar, Emmanuel Mvuyekule alichaguliwa kuwa mchezaji bora wa mchezo huo kutokana na kiwango kizuri alichoonyesha.