Category: TAARIFA

Ratiba ya Ligi Kuu ya NBC 2025/2026

MAHAKAMA YA KIMATAIFA YA USULUHISHI WA MICHEZO CAS YATUPILIA MBALI RUFANI YA YOUNG AFRICAN

MAHAKAMA ya Kimataifa ya Usuluhishi wa Michezo (CAS) imetupa rufani ya klabu ya Yanga yenye kumbukumbu namba CAS 2025/A/11298 ambayo klabu hiyo iliifungua dhidi ya Shirikisho la Mpira wa Miguu Tanzania (TFF) kuhusiana na mchezo namba 184 wa Ligi Kuu ya NBC (Young Africans SC vs Simba SC).

Walalamikiwa wengine katika shauri hilo ambapo pamoja na mengine, klabu ya Yanga iliomba mechi tajwa hapo juu isipangiwe tarehe mpaka litakapotolewa uamuzi, ni Bodi ya Ligi Kuu Tanzania (TPLB), na klabu ya Simba.

Kutokana na uamuzi huo wa CAS, Bodi ya Ligi Kuu Tanzania inaendelea na maandalizi yake ya kuhitimisha msimu wa Ligi Kuu ya NBC 2024/2025 na kufanya maboresho ya ratiba ya Ligi (ukiwemo mchezo namba 184 – Young Africans vs Simba SC) kisha kutangaza ratiba mpya mapema iwezekanavyo.

LIGI YA CHAMPIONSHIP YA NBC YABAKIZA MIZUNGUKO MITATU

BODI ya Ligi Kuu Tanzania (TPLB) inautaarifu umma kuwa Ligi ya Championship ya NBC msimu wa 2024/2025 inaingia kwenye mzunguko wa 28 leo Jumamosi Aprili 26, 2025 ambapo kila klabu imesaliwa na michezo mitatu tu kabla ya kumaliza msimu.

Bodi ilipanga na kutangaza kuwa michezo yote ya kila mzunguko uliosalia itachezwa katika tarehe na muda mmoja kwa lengo la kuongeza usawa kwenye ushindani baina ya timu shiriki.

Kwasababu inafahamika kuwa ushindani na msukumo umeongezeka zaidi katika kipindi hiki klabu zinafanya jitihada za kutimiza malengo yao ya msimu, Bodi imeongeza nguvu katika usimamizi wa michezo hiyo ili msukumo huo uzae burudani viwanjani badala ya kusababisha uvunjifu wa Kanuni za Ligi na sheria za mpira wa miguu.

Ni wajibu wa kila mdau wa Ligi hiyo kuhakikisha anafuata Kanuni za Ligi ikiwemo kujiepusha na kukumbusha wengine kutojihusisha na vitendo vyovyote vinavyoashiria upangaji wa matokeo.

Bodi ya Ligi Kuu Tanzania itachukua hatua kali za kinanuni kwa kila mdau atakayebainika na kuthibitika amejihusisha kwa namna yoyote na upangaji wa matokeo kwasababu jambo hilo ni katika mambo yanayoweza kushusha hadhi ya Ligi.

Bodi ya Ligi Kuu Tanzania inawatakia kila la kheri wadau wote wa Ligi hiyo kuelekea michezo iliyosalia.

TAARIFA YA KAMATI YA USIMAMIZI WA LIGI YA BODI YA LIGI KUU

Kamati ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Februari 21, 2025 ilipitia mwenendo na matukio ya Ligi na kufanya maamuzi yafuatayo;

Ligi Kuu ya NBC

Mechi Namba 140: Mashujaa FC 0-0 Coastal Union

Klabu ya Mashujaa ya Kigoma imeadhibiwa kwa kutozwa faini ya Sh. 1,000,000 (milioni moja) kwa kosa la kuingia uwanjani kwa kutumia mlango usio rasmi kinyume namatakwa ya Kanuni ya 17:21 ya Ligi Kuu kuhusu Taratibu za Mchezo, na kusababisha mdhamini mwenye haki yamatangazo ya runinga, Azam Media Limited kushindwakupata picha za tukio la timu kuwasili. Adhabu hii ni kwa mujibu wa kanuni ya 17:62 ya Ligi Kuu kuhusu Taratibu za Mchezo.

Mechi Namba 147: JKT Tanzania 0-1 Singida BS

Klabu ya Singida BS imeadhibiwa kwa kutozwa faini ya Sh. 1,000,000 (milioni moja) kwa kosa la kutokutumia chumba maalumu cha kubadilishia nguo, kinyume na matakwa yaKanuni ya 17:20 ya Ligi Kuu kuhusu Taratibu za Mchezo. Adhabu hii ni kwa mujibu wa kanuni ya 17:62 ya Ligi Kuu kuhusu Taratibu za Mchezo.

Mechi Namba 150: Tabora United 1-1 KenGold

Klabu ya Tabora United imeadhibiwa kwa kutozwa faini ya Sh. 2,000,000 (milioni mbili) kwa kosa la wawakilishi watimu hiyo kufika kwenye kikao cha maandilizi ya mchezo bila kifaa chochote kinyume na matakwa ya kanuni ya17:2(2.2) ya Ligi Kuu kuhusu Taratibu za Mchezo.

Adhabu hii ni kwa mujibu wa kanuni ya 17:(2.2 & 62) ya Ligi Kuu kuhusu Taratibu za Mchezo.

Mechi Namba 151: Azam FC 2-0 Mashujaa FC

Klabu ya Mashujaa ya imeadhibiwa kwa kutozwa faini ya Sh. 1,000,000 (milioni moja) kwa kosa la kuchelewakurejea kiwanjani baada ya muda wa mapumziko kumalizika. Mashujaa walichelewa kutoka vyumbani kwa dakika tano (5) jambo lililosababisha kuchelewa kuanzakwa kipindi cha pili.Adhabu hii ni kwa mujibu wa kanuni ya 17:(33 & 62) ya Ligi Kuu kuhusu Taratibu za Mchezo.

Mchezaji Seif Karihe wa Mashujaa ameadhibiwa kwa kufungiwa michezo mitatu (3) na kutozwa faini ya Sh. 500,000 (laki tano) kwa kosa la kumkanyaga kwa makusudi mchezaji wa Azam FC, Feisal Salum. Karihe alimkanyaga Feisal wakati akiwa chini baada ya kumfanyia rafu.Adhabu hii ni kwa mujibu wa kanuni ya 41:5 ya Ligi Kuu kuhusu Udhibiti kwa Wachezaji.

Mechi Namba 155: Namungo FC 0-3 Simba SC

Mchezaji wa Namungo Daniel Amoah ameadhibiwa kwa kutozwa faini ya Sh. 500,000 (laki tano) kwa kosa la kuonekana akimwaga vimiminika kwenye goli jambolililohusianishwa na vitendo vinavyoashiria imani za kishirikina.Amoah alionekana akifanya tukio hilo wakati timu ya Simba ikijiandaa kupiga penati.Adhabu hii ni kwa mujibu wa kanuni ya 41:3 ya Ligi Kuu kuhusu Udhibiti kwa Wachezaji.

TAARIFA

Kamati ya Uendeshaji na Usimamizi wa Ligi imefuta adhabuya kadi nyekundu kwa mchezaji wa Namungo, Derick Mukombozi aliyoadhibiwa na mwamuzi wa mchezo tajwahapo juu. Kamati imefikia maamuzi hayo baada ya kujiridhisha kuwa maelezo yyaliyopo kwenye ripoti yamwamuzi hayana ushahidi wa kutosha unaoendana namarejeo ya picha mjongeo.

Mechi Namba 157: Mashujaa 2-0 Pamba

Klabu ya Mashujaa ya mkoani Kigoma imeadhibiwa kwakupewa onyo kali kwa kosa la Watoto waokota mipira (ball kids) kuchelewa kwa makusudi kurejesha mipira uwanjanikwa wakati. Adhabu hii ni kwa mujibu wa kanuni ya 17:48 ya Ligi Kuu kuhusu Taratibu za mchezo.

Mchezaji wa klabu ya Pamba Jiji ya Mwanza, KassimSuleiman ameadhibiwa kwa kufungiwa michezo mitatu (3) na kutozwa faini ya Sh. 500,000 (laki tano) kwa kosa la kumpiga kwa kutumia mpira ‘Ball Kid’ baada ya kukaa nampira huo muda mrefu bila kuurejesha kiwanjani. Mchezaji huyo aliadhibiwa kwa kadi nyekundu pia na mwamuzi wa mchezo kwa kosa hilo Adhabu hii ni kwa mujibu wa kanuni ya 41:5 ya Ligi Kuu kuhusu Udhibiti kwa Wachezaji.

Mechi Namba 159: Young Africans 2-1 Singida BS

Klabu ya Young Africans imeadhibiwa kwa kupewa onyo kali kwa kosa la viongozi wake kuingia kwenye eneo la kuchezea (pitch area) baada ya mchezo tajwa hapo juukukamilika.

Viongozi hao wa klabu ya Yanga walioingia uwanjani walisababisha kukosekana kwa utulivu wakati wamahojiano ya mdhamini mwenye haki za matangazo yaruninga.Adhabu hii ni kwa mujibu wa kanuni ya 17:50 ya Ligi Kuu kuhusu Taratibu za Mchezo.

Mechi Namba 160: KenGold 1-0 Kagera Sugar

Klabu ya KenGold imeadhibiwa kwa kutozwa faini ya Sh. 1,000,000 (milioni moja) kwa kosa la maafisa wake kuchelewa kuwasili kwenye kikao cha maandalizi ya mchezo (MCM). Maafisa hao walifika kwenye kikao saa 4:30asubuhi badala ya saa 4:00 asubuhi kinyume na matakwaya Kanuni ya 17:2(2.2) ya Ligi Kuu kuhusu Taratibu za Mchezo. Adhabu hii ni kwa mujibu wa Kanuni ya 17:62 ya Ligi Kuu kuhusu Taratibu za Mchezo.

Ligi ya Championship ya NBC

Mechi Namba 151:  Stand United 2-1 TMA

Klabu ya TMA imeadhibiwa kwa kutozwa faini ya Sh. 1,000,000 (milioni moja) kwa kosa la kuharibu uzio wauwanja wa CCM Kambarage, Shinyanga. TMA walifanya uharibifu huo ili wachezaji wao wapite chini ya uzio badala ya kupita kwenye mlango rasmi.

TMA walitumia eneo hilo la uzio lililoharibiwa kwa kuingiakiwanjani wakati wa kupasha misuli moto, wakati wakwenda kuanza kwa mchezo, wakati wa mapumziko nabaada ya mchezo kinyume na matakwa ya Kanuni ya 17:21 ya Ligi ya Championship kuhusu Taratibu za Mchezo. Adhabu hii ni kwa mujibu wa Kanuni ya 17:62 ya Ligi yaChampionship kuhusu Taratibu za Mchezo.

TAARIFA KUTOKA BODI YA LIGI TANZANIA

KAMATI ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Disemba 1, 2022 ilipitia mwenendo na matukio mbalimbali ya Ligi na kufanya maamuzi yafuatayo;

 

Ligi Kuu ya NBC (NBCPL)

Mechi Namba 37: Mbeya City FC 1-1 Simba SC

Timu ya Simba imetozwa faini ya Sh. 1,000,000 (milioni moja) kwa kosa la baadhi ya wachezaji wake kuingia uwanjani kwa kupitia mlango usio rasmi kuelekea mchezo tajwa hapo juu uliofanyika kwenye uwanja wa Sokoine, Mbeya Novemba 23, 2022.

Simba walilazimisha baadhi ya wachezaji wao waruhusiwe kuingia uwanjani kupitia mlango wa kuingilia jukwaa la watu maalum na walipozuiwa na walinzi wa uwanjani (stewards), Simba walitumia nguvu kutimiza nia yao.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

 

Mchezaji wa timu ya Simba, Gadiel Michael amefungiwa michezo mitatu (3) na kutozwa faini ya Sh. 500,000 (laki tano) kwa kosa la kulazimisha kuingia uwanjani saa 4:25 asubuhi ya siku ya mchezo tajwa hapo juu kwa kile alichoeleza alitaka kukagua kiwanja.

Licha ya walinzi wa uwanja huo kumzuia Gadiel (ambaye alikuwa ameongozana na watu kadhaa waliovalia fulana zenye nembo ya klabu ya Simba), kwasababu haukuwa muda rasmi kwa ajili ya zoezi hilo na Simba hawakufanya mawasiliano yoyote na Kamishna wala Mratibu wa Mchezo wakieleza jambo hilo, Gadiel alitumia hila na kufanikiwa kuwakwepa walinzi hao kisha kuingia kiwanjani.

Mchezaji huyo alipoingia kiwanjani hakuonesha dalili yoyote ya kukagua eneo la kuchezea na badala yake alionekana kwenda moja kwa moja hadi eneo la katikati ya kiwanja na kumwaga vitu vyenye asili ya unga.

Adhabu hii ni kwa uzingativu wa Kanuni 41:5(5.5) ya Ligi Kuu kuhusu udhibiti kwa Wachezaji.

 

Kamati imeikumbusha Timu ya Mbeya City kuhakikisha viongozi wake waliofungiwa wanatekeleza adhabu zao kikamilifu ikiwemo kutojihusisha na masuala ya timu hiyo hadi pale adhabu zao zitakapomalizika.

Katika mchezo tajwa hapo juu, kiongozi wa Mbeya City, Frank Mfundo ambaye anatumikia adhabu ya kufungiwa, alionekana kufanya kazi za klabu hadi pale walipomuondoa kwa haraka baada ya kuelezwa juu ya jambo.

Klabu ina wajibu wa kuhakikisha viongozi na wachezaji wao walioadhibiwa wanatekeleza masharti ya adhabu zao kama ilivyoainishwa kwenye Kanuni ya 47:5 ya Ligi Kuu kuhusu Udhibiti kwa Klabu.

 

Timu ya Mbeya City imetozwa faini ya Sh. 500,000 (laki tano) kwa kosa la baadhi ya viongozi wake kumtolea lugha chafu Mratibu Msaidizi wa Mchezo tajwa hapo, wakilazimisha kuingia katika eneo la kimashindano mara baada ya mchezo kumalizika na wakati makochwa wa timu zote mbili wakiendelea kuhojiwa na Azam TV.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

Mchezo tajwa hapo juu ulikuwa na mapungufu katika uamuzi hivyo Kamati imepeleka shauri la waamuzi wa mchezo huo kwenye Kamati ya Waamuzi ya Shirikisho la Mpira wa Miguu, TFF kwa ajili kujadiliwa na kutolewa ushauri wa kitaalamu kabla ya kufanyika kwa maamuzi.

 

Mechi Namba 38: Ihefu SC 2-1 Young African SC

Kocha wa timu ya Young African, Nasreddine Nabi amefungiwa michezo mitatu na kutozwa faini ya Sh. 500,000 (laki tano) kwa kosa la kuwashambulia kwa maneno mwamuzi wa kati na mwamuzi wa akiba wa mchezo tajwa hapo juu.

Kocha Nabi aliendelea kufanya kitendo hicho hata baada ya kuonywa kwa kadi ya manjano.

Adhabu hii ni kwa uzingativu wa Kanuni ya 42:2(2.1) ya Ligi Kuu kuhusu Udhibiti kwa Makocha.

 

Mechi Namba 106: Ruvu Shooting FC 0-1 Singida Big Stars FC

Klabu ya Ruvu Shooting imetozwa faini ya Sh. 500,000 (laki tano) kwa kosa la kuchelewa kuwasili uwanjani kuelekea mchezo tajwa hapo juu.

Ruvu Shooting waliwasili uwanjani saa 8:42 mchana badala ya saa 8:30 mchana kama ilivyoainishwa kwenye kanuni ya 17:15 ya Ligi Kuu kuhusu Taratibu za Mchezo.

Adhabu hii ni kwa uzingativu wa Kanuni ya 17:60 ya Ligi Kuu kuhusu Taratibu za Mchezo.

 

Mechi Namba 109: Polisi Tanzania FC 1-3 Simba SC

Klabu ya Polisi Tanzania imetozwa faini ya Sh. 500,000 (laki tano) kwa kosa la kuingia uwanjani kwa kupitia mlango usio rasmi kuelekea mchezo tajwa hapo juu uliofanyika kwenye uwanja wa Ushirika uliopo mjini Moshi mkoani Kilimanjaro, Novemba 27, 2022.

Adhabu hii ni kwa uzingativu wa Kanuni ya 17:(21 & 60) ya Ligi Kuu kuhusu Taratibu za Mchezo.

 

Mechi Namba 110: Azam FC 3-2 Coastal Union FC

Mchezaji wa klabu ya Coastal Union, Maabadi Maabadi amefungiwa michezo mitatu (3) na kutozwa faini ya Sh. 500,000 (laki tano) kwa kosa la kumshambulia mwamuzi wa kati wa mchezo tajwa hapo juu kwa kumrushia chupa ya maji na baadaye kiatu.

Mchezaji huyo ambaye alikuwa kwenye benchi baada ya kufanyiwa mabadiliko, alionekana akiingia kiwanjani na kumrushia chupa mwamuzi wa kati wakati mchezo ukiendelea kisha kwenda kumshambulia mwamuzi huyo kwa kutumia kiatu baada ya mchezo kumalizika.

Adhabu hii ni kwa uzingativu wa Kanuni ya 41:5(5.3) ya Ligi Kuu kuhusu Udhibiti kwa Wachezaji.

 

Klabu ya Coastal Union imetozwa faini ya Sh. 1,000,000 (milioni moja) kwa kosa la baadhi ya wachezaji wake na viongozi wa benchi la ufundi kurusha chupa za maji kiwanjani wakati mchezo ukiendelea.

Adhabu hii ni kwa uzingativu wa Kanuni ya 47:1 ya Ligi Kuu kuhusu Udhibiti kwa Klabu.

 

Klabu ya Azam imetozwa faini ya Sh. 1,000,000 (milioni moja) kwa kosa la shabiki wake aliyekuwa ameketi kwenye jukwaa la watu maalum, kurusha chupa ya maji kwa hasira katika eneo hilo mara baada ya timu ya Coastal Union kupata bao la kusawazisha katika mchezo tajwa hapo juu uliomalizika kwa Azam kupata ushindi wa mabao 3-2.

Adhabu hii ni kwa uzingativu wa Kanuni ya 47:1 ya Ligi Kuu kuhusu Udhibiti kwa Klabu.

 

Kamati imepeleka shauri la waamuzi wa mchezo tajwa hapo juu kwenye Kamati ya Waamuzi ya Shirikisho la Mpira wa Miguu, TFF kwa ajili kujadiliwa na kutolewa ushauri wa kitaalamu kabla ya kufanyika kwa maamuzi.

 

Ligi ya Championship

Mechi Namba 86: Pan Africans FC 2-0 Biashara United FC

Klabu ya Pan Africans imepewa onyo kwa kosa la kuwakilishwa na maafisa pungufu kwenye kikao cha maandalizi ya mchezo (MCM).

Pan Africans iliwakilishwa na maafisa wanne (4) badala ya watano (5) walioainishwa kikanuni.

Adhabu hii ni kwa uzingativu wa Kanuni ya 17:2(2.2) na 17:60 ya Championship kuhusu Taratibu za Mchezo.

 

Imetolewa na;

Idara ya Habari na Mawasiliano

Bodi ya Ligi Kuu Tanzania (TPLB)

Disemba 2, 2022

 

TAARIFA KUTOKA BODI YA LIGI KUU TANZANIA

KAMATI ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Novemba 25, 2022 ilipitia mwenendo na matukio mbalimbali ya Ligi na kufanya maamuzi yafuatayo;

 

Ligi Kuu ya NBC (NBCPL)

Mechi Namba 53: Singida Big Stars FC 1-1 Simba SC

Mchezaji wa timu ya Singida Big Stars, Shafiq Batambuze amefungiwa michezo mitatu (3) na kutozwa faini ya Sh. 500,000 (laki tano) kwa kosa la kuingia kiwanjani kuanza kupasha moto misuli dakika 10 kabla ya muda ulioainishwa kwenye ratiba ya matukio ya mchezo.

Mchezaji huyo alipinga maelekezo ya Mratibu wa Mchezo (GC) na Kamishna wa Mchezo waliomtaka arejee chumbani hadi muda uliopangwa utakapowadia. Akiwa kiwanjani, Shafiq Batambuze alionekana kumwaga vitu kwenye majani jambo lililoashiria imani za kishirikina.

Adhabu hii ni kwa uzingativu wa Kanuni 41:5(5.5) ya Ligi Kuu kuhusu udhibiti kwa Wachezaji.

 

Kamati imewafungia michezo mitatu na kuwatoza faini ya Sh. 1,000,00 (milioni moja) kila mmoja, Kocha Msaidizi wa Singida Big Stars, Mathias Lule na Kocha wa Makipa wa timu hiyo, Steven Kiagundu kwa kosa la kumuamuru Shafiq Batambuze aendelee kusalia kiwanjani hata pale mchezaji huyo alipojaribu kuondoka.

Adhabu hii ni kwa uzingativu wa Kanuni ya 45:2(2.4) ya Ligi Kuu kuhusu Udhibiti kwa Makocha.

 

Timu ya Singida Big Stars imetozwa faini ya Sh. 500,000 (laki tano) kwa kosa la kushindwa kuhudhuria Mkutano wa Wanahabari uliopangwa kufanyika Novemba 8, 2022 kwenye ukumbi wa Benki ya NBC tawi la Singida, kuelekea mchezo tajwa hapo juu.

Adhabu hii ni kwa uzingativu wa Kanuni ya 17:(56 & 60) ya Ligi Kuu kuhusu Taratibu za Mchezo.

 

 

Mechi Namba 94: Ihefu SC 1-2 Polisi Tanzania FC

Kamati imemfungia miezi mitatu (3) na kumtoza faini ya Sh. 500,000 (laki tano), Afisa Usalama wa klabu ya Polisi, Nelson Ngonyani kwa kosa la kumshambulia kwa matusi Mratibu wa Mchezo tajwa hapo juu, akipinga maelekezo halali yanayohusu kufuata taratibu za mchezo.

Afisa Usalama huyo aliendelea kwa kumtaka Mratibu wa Mchezo husika akashtaki kwenye mamlaka yoyote kwani anajua hakuna anayeweza kumfanya chochote.

Adhabu hii ni kwa uzingativu wa Kanuni ya 46:3 ya Ligi Kuu kuhusu Udhibiti kwa Viongozi.

 

Mechi Namba 104: Dodoma Jiji FC 0-2 Young Africans SC

Timu ya Young Africans  imepewa onyo kwa kosa la kuchelewa kuwasili kwenye Mkutano wa Wanahabari (Pre-Match Press Conference) kwa dakika 35.

Kocha Mkuu na nahodha au mchezaji mwenye ushawishi kikosini wanapaswa kushiriki mkutano wa Wanahabari siku moja kabla ya mchezo na katika muda uliopangwa kwenye ratiba ya mikutano hiyo.

Yanga walifika ukumbini saa 7:05 mchana badala ya saa 6:30 mchana.

Adhabu hii ni kwa uzingativu wa Kanuni ya 17:(56 & 60) ya Ligi Kuu kuhusu Taratibu za Mchezo.

 

Kamati imeionya timu ya Dodoma Jiji kwa kosa la viongozi wake kuingia katika chumba cha kuvalia wachezaji wa timu hiyo ndani ya muda wa kikanuni wa mchezo.

Viongozi hao walishuka kutoka jukwaani wakati wa mapumziko na kuingia ndani ya chumba hicho, kitendo ambacho ni kinyume na matakwa ya Kanuni ya 17:17 ya Ligi Kuu kuhusu Taratibu za Mchezo.

Adhabu hii ni kwa uzingativu wa Kanuni ya 17:60 ya Ligi Kuu kuhusu Taratibu za Mchezo.

 

MUHIMU

Kamati ya Uendeshaji na Usimamizi wa Ligi imepeleka mashauri yote ya waamuzi kwenye Kamati ya Waamuzi ya TFF kwa ajili ya uchambuzi wa kitaalamu wa maamuzi yote yenye utata yaliyofanyika kwenye michezo ya Ligi Kuu ya NBC, kabla ya kurejeshwa kwa ajili ya kujadiliwa na kutolewa maamuzi na Kamati ya Uendeshaji na Usimamizi wa Ligi.

Ligi ya Championship

Mechi Namba 65: Biashara United FC 2-1 Kitayosce FC

Timu ya Biashara United imetozwa faini ya Sh. 500,000 (laki tano) kwa kosa la mashabiki wake kutoa vitisho na lugha ya matusi kwa waamuzi wa mchezo tajwa hapo juu kabla ya kuanza kwa mchezo.

Mashabiki hao waliendelea kufanya vitendo visivyo vya kimchezo kwa kurusha mawe juu ya paa la chumba cha waamuzi wakitoa kauli za vitisho kuwa waamuzi hao wasingetoka salama uwanjani hapo kama timu yao isingepata matokeo ya ushindi katika mchezo huo.

Adhabu hii ni kwa uzingativu wa Kanuni ya 47 ya Championship kuhusu Udhibiti kwa Klabu.

 

MUHIMU

Kamati imeitaka klabu ya Biashara United kuhakikisha vitendo vya namna hii havijirudii tena kwenye uwanja wao kwani vikijirudia, hatua kali zaidi za kikanuni zitachukuliwa ikiwemo kuzuia mashabiki kuingia uwanjani katika michezo yake yote au kuufungia uwanja Karume kutumika kwa michezo ya Ligi.

 

Mechi Namba 72: Gwambina FC 2-4 Ndanda FC

Klabu ya Gwambina imetozwa faini ya Sh. 500,000 (laki tano) kwa kosa la kuchelewa kufika uwanjani kwa dakika 38.

Gwambina ilifika kwenye uwanja wa Nyamagana saa 9:08 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 17:60 ya Championship kuhusu Udhibiti kwa Klabu.

 

Mechi Namba 73: Gwambina FC 2-1 Mashujaa FC

Klabu ya Gwambina imetozwa faini ya Sh. 500,000 (laki tano) kwa kosa la kuchelewa kufika uwanjani kwa dakika 75.

Gwambina ilifika kwenye uwanja wa Nyamagana saa 9:45 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 17:60 ya Championship kuhusu Taratibu za Mchezo.

Mechi Namba 76: Mbuni FC 0-1 JKT Tanzania FC

Klabu ya Mbuni imetozwa faini ya Sh. 500,000 (laki tano) kwa kosa la mashabiki wake wakiongozwa na Katibu wa klabu hiyo, Michael Yoen kuwashambulia waamuzi baada ya kumalizika kwa mchezo tajwa hapo juu kwenye uwanja wa Aga Khan jijini Arusha.

Adhabu hiyo ni kwa uzingativu wa Kanuni ya 47 ya Championship kuhusu Udhibiti kwa Klabu.

 

Kamati imemfungia miezi sita (6) na kumtoza faini ya Sh. 2,000,000 (milioni mbili) katibu wa Mbuni FC, Michael Yoen kwa kosa la kuongoza mashabiki kuwashambulia waamuzi na kuendelea kuwafuatilia waamuzi hao hadi hotelini walikofikia.

Adhabu hiyo ni kwa uzingativu wa Kanuni ya 46:3 ya Championship kuhusu Udhibiti kwa Viongozi.

 

Kamati imempongeza Afisa Usalama wa Chama cha Mpira wa miguu mkoa wa Arusha (ARFA), Mike Warioba kwa juhudi zake za kuhakikisha waamuzi na Kamishna wa mchezo huo hawapati madhara zaidi kutokana na vurugu za mashabiki hao.

Mike Warioba aliwaondoa maafisa hao hotelini na kwenda kuwapa hifadhi katika kituo kikuu cha polisi Arusha kabla ya kuwatafutia usafiri wa kuwaondoa jijini Arusha usiku huo huo wa Novemba 19, 2022.

 

First League

Mechi Namba 14B: Stand United FC 2-0 Kasulu FC

Klabu ya Kasulu imepewa onyo kali kwa kosa la kuwakilishwa na maafisa pungufu kwenye kikao cha maandalizi ya mchezo (MCM).

Kasulu iliwakilishwa na maafisa wawili (2) badala ya watano (5) walioainishwa kikanuni.

Adhabu hii ni kwa uzingativu wa Kanuni ya 18:2(2.2) na 18:60 ya First League kuhusu Taratibu za Mchezo.

 

Mechi Namba 19B: Kasulu FC 1-3 Rhino Rangers FC

Klabu ya Kasulu imepewa onyo kali kwa kosa la kuchelewa kufika uwanjani kwa dakika 80.

Kasulu ilifika kwenye uwanja wa Nyamagana saa 9:50 alasiri badala ya saa 8:30 mchana kama ilivyoainishwa kwenye Kanuni ya 17:15 ya Championship kuhusu Taratibu za Mchezo.

Adhabu hiyo ni kwa uzingativu wa Kanuni ya 18:(15 & 60) ya First League kuhusu Taratibu za Mchezo.

 

Kuhusu Klabu ya Njombe Mji

Bodi ya Ligi imepokea barua ya klabu ya Njombe Mji ya mkoani Njombe wakiomba kujitoa kushiriki First League msimu huu wa 2022/2023 baada ya na kukumbwa na matatizo ya kifedha, hali iliyosababisha timu hiyo ishindwe kumudu gharama za kushiriki ligi hiyo.

Kutokana na ombi hilo, Klabu ya Njombe Mji haitoendelea kushiriki First League msimu wa 2022/2023, imeshushwa daraja na kufungiwa kucheza Ligi kwa misimu miwili (2).

Adhabu hii ni kwa mujibu wa Kanuni ya 31:4(4.1) ya First League kuhusu Kujitoa.

Kwasababu idadi ya michezo ambayo Njombe Mji imecheza hadi kujitoa kwake haizidi nusu ya michezo yote, matokeo ya michezo yote iliyocheza yamefutwa kwa mujibu wa Kanuni ya 31:4(4.3) ya First League kuhusu Kujitoa.

 

Imetolewa na;

Idara ya Habari na Mawasiliano

Bodi ya Ligi Kuu Tanzania (TPLB)

Novemba 26, 2022