Ligi Kuu ya NBC msimu wa wa 2026/27 iliendelea kutimua ‘vumbi’ kwa timu za Simba, TRA United na Mashujaa baada ya kushinda michezo yao wakiwa uwanja wa nyumbani.

Katika mchezo wa mapema uliochezwa kwenye uwanja wa Sheikh Amri Abeid TRA United ilibuka na ushindi wa mabao 3-2 dhidi ya Fountain Gate.

TRA united ilipata mabao yake kupitia kwa Anni Elijah dakika ya 31, emmanuel Mwanengo dakika ya 38 na Amy Mapaka dakika ya 89 aliyehitimisha mabao ya TRA United.

Kwa upande wa Fountain Gate mabao yalifungwa na Hashimu Kindemile dakika ya 60 na Chukwunonye Obasi dakika ya 65 akiwapa Fountain mabao ya kufutia machozi.

Nayo Mashujaa ilitumia vyema uwanja wa nyumbani wa lake Tanganyika mkoani Kigoma baada ya kuibuka na ushindi wa bao 1-0 dhidi ya Pamba Jiji.

Crispin Ngushi ndiye aliyeiweka Mashujaa mbele kwa kufunga bao la pekee la mchezo dakika ya 20 lililodumu hadi filimbi ya mwisho na kuipa alama zote tatu huku Pamba jiji wakipoteza alama wakiwa ugenini.

Katika mchezo uliochezwa uwanja wa uhuru jijini Dar es saalam timu ya Simba iliibuka na ushindi wa mabao 3-2 dhidi ya Namungo katika pambano lililokuwa na ushindani mkubwa huku Simba ikiendelea kusalia kwenye kilele cha msimamo wa Ligi Kuu ya NBC.

Simba ilianza kwa kasi na kupata bao la kuongoza dakika ya nne kupitia Anicet Oura lakini Namungo ilisawazisha dakika ya 35 kupitia Raymond Lulendi kabla ya mshambuliaji huyo kuongeza bao la pili dakika ya 43 na kuifanya timu yake kwenda mapumziko ikiwa mbele kwa mabao 2-1.

Kipindi cha pili Simba ilirejea na kusawazisha dakika ya 79 kupitia Rushine De Reuck kwa mkwaju wa Penati na Anicet Oura kuhitimisha bao la tatu dakika ya 88 na kufanya Simba kuendeleza rekodi ya ushindi wa asilimia 100.

Polisi Tanzania imepata ushindi wa kwanza msimu huu kwenye uwanja wa Ushirika, Kilimanjaro dakika za mwisho baada ya kuifunga Geita Gold bao 1-0 katika mchezo wa Ligi Kuu ya NBC.

Mchezo huo ulikuwa na ushindani mkubwa ambapo ilibidi kusubiri hadi dakika za nyongeza Isaya Kuzoza wa Geita Gold kujifunga na kuipa Polisi Tanzania ushindi wa bao moja.

Ushindi huo unaifanya Polisi Tanzania kujikusanyia alama tatu muhimu na kuwa ushindi wa kwanza msimu huu kwenye uwanja wa ushirika kwa Maafande hao huku Geita Gold ikiondoka patupu.

Katika mchezo mwingine uliochezwa saa 1:00 usiku kwenye uwanja wa KMC Complex timu ya Yanga iliwakaribisha Kagera Sugar na ‘wananchi’ kuichapa Kagera Sugar mabao 4-0.

Mshambuliaji Peter Shalulile alianza kuandika ushindi wa Yanga dakika ya 26, kabla ya Mohamed Hussein kuongeza bao la pili dakika ya 32 na kuifanya timu hiyo kwenda mapumziko ikiwa mbele kwa mabao 2-0.

Kipindi cha pili, Yanga iliendelea kutawala mchezo na kupata mabao mawili kupitia kwa Cheikh Toure aliyefunga dakika 83 na 90+7 akihitimisha ushindi wa mabao 4-0.

Matokeo haya yanaifanya Yanga kuondoka na alama tatu muhimu ikiishusha Azam nafasi ya pili baada ya kufikisha alama 27.

 

Michezo miwili ya raundi ya 11 ya Ligi Kuu ya NBC msimu wa 2026/27  imeshuhudia Coastal Union na Dodoma Jiji zikigawana alama baada ya kutoka suluhu na Azam kupata ushindi ugenini kwa mabao 2-1 dhidi ya ‘maafande’ wa JKT.

Katika mchezo uliichezwa kwenye uwanja wa CCM Mkwakwani mkoani Tanga saa 10:00 alasiri, Coastal Union na Dodoma Jiji zimeshindwa kupata bao dakika zote 90 na matokeo yalifanya kila timu kuondoka na alama moja.

Katika mchezo huo, mchezaji wa Dodoma Jiji , Iddy Kipagwile, alifunga bao ambalo lilikataliwa na mwamuzi wa mchezo huo kutokana na faulo iliyotokea kabla ya mpira kutinga nyavuni.

Yesse Kibamba wa Dodoma Jiji alichaguliwa kuwa mchezaji bora wa mchezo huo baada ya kuonesha kiwango bora.

Katika mchezo mwingine uliochezwa kwenye uwanja wa Meja Jenerali Isamuhyo, JKT waliwakaribisha Azam kwenye uwanja wao wa nyumbani mchezo ulichezwa saa 12:30 jioni.

JKT Tanzania ndiyo ilianza kupata bao kupitia kwa Karim Mfaume dakika ya 13 kabla ya Iddi Seleman kuisawazishia Azam dakika ya 29.

Lusajo Mwaikenda aliihakikishia Azam ushindi baada ya kufunga bao la pili dakika ya 59 kwa ‘utosi’ bao lililompa tuzo ya mchezaji bora wa mchezo huo baada ya kuamua matokeo.

Ushindi huo unaipa Azam alama zote tatu, na huku Coastal Union na Dodoma Jiji zikigawana alama moja kila moja katika mchezo wa raundi ya 11.

LIGI Kuu ya NBC imeendelea jana kwa mchezo uliowakutanisha Geita Gold na Fountain Gate mkoani Geita katika uwanja wa Bukombe na kumalizika kwa sare ya bao 1-1.

Fountain Gate iliyokuwa ya kwanza kupata bao kupitia kwa mshambuliaji Chukwunonye Macdonald aliyefunga kwa mkwaju wa Penati dakika ya 42 na kuipa timu yake matumaini ya kuondoka na ushindi.

Hata hivyo Geita Gold ilirejea mchezoni kipindi cha pili na kusawazisha kupitia kwa Yusuph Muhilu dakika ya 63 akirejesha ushindani katika mchezo huo.

Baada ya bao hilo timu ziliendelea kutafuta bao la ushindi lakini hakuna iliyofanikiwa kuongeza hadi dakika ya 90 na hivyo wababe hao kugawana alama.

Matokeo hayo yanaifanya Geita Gold kupanda kutoka nafasi ya 13 hadi ya 12 ikiwa imefunga mabao 10 na kukusanya alama nane huku Fountain Gate ikiwa ya 16, imefunga mabao matano na kukusanya alama sita kwenye msimamo wa ligi Kuu ya NBC.

 

Michezo mitatu ya Ligi Kuu ya NBC msimu huu mzunguko wa tisa imeshuhudia TRA ikilazimishwa suluhu nyumbani na Yanga, JKT Tanzania ikiibuka na ushindi wa bao bao moja dhidi ya Kagera Sugar huku Namungo ikiichapa Coastal Union mabao 2-1.

Baada ya suluhu hiyo iliyopatikana uwanja wa Sheikh Amri Abeid, Yanga imeshindwa kupata ushindi kwenye mchezo wa pili mfululizo ikiwa ni baada ya kupoteza katika ‘Dabi’ ya Kariakoo dhidi ya mahasimu wao Simba.

Katika mchezo huo timu zote mbili zilishindwa kutumia nafasi zao kupata mabao hivyo kulazimisha kugawana alama baada ya dakika 90 za mchezo.

Katika mchezo wa pili uliochezwa uwanja wa Mej Jen Isamuhyo, timu ya JKT Tanzania waliikaribisha Kagera Sugar na kubaki na alama zote tatu baada ya ushindi wa bao moja.

Valentino Mashaka ndiye aliyeipa JKT Tanzania ushindi baada ya kufunga bao la pekee la mchezo dakika ya 61.

Ushindi huo unaifanya JKT kukwea hadi nafasi ya nne kwenye msimamo wa Ligi Kuu ya NBC ikifikisha alama 16.

Namungo ilihitimisha michezo ya jana kwa ushindi wa mabao 2-1 dhidi ya Coastal Union katika mchezo uliopigwa kwenye uwanja wa Majaliwa mkoani Lindi.

Namungo ilianza kwa kasi na kupata bao la mapema sekunde ya 17 kupitia Gamba Matiko lakini Coastal Union ilisawazisha dakika ya tisa kupitia Shiza Kichuya.

Hata hivyo Namungo iliendelea kupambana kutafuta bao la ushindi na juhudi zake zilizaa matunda dakika ya 66 baada ya Herbert Lukindo kufunga bao la pili kwa ‘utosi’ na kunyanyua mashabiki wake wa Namungo hivyo kuondoka na alama tatu muhimu.

Hizo ni alama tatu muhimu kwa kocha Juma Mgunda na vijana wake, zikiwafanya kufikisha alama 12 na kupanda hadi nafasi ya saba kwenye msimamo wa Ligi Kuu ya NBC.