Mshambuliaji wa timu ya Polisi Tanzania Anuary Jabir hacheki na yeyote kwenye suala la kutupia mabao nyavuni ndani ya Ligi Kuu ya NBC akiwa ndiye kinara wa mabao hadi sasa baada ya kufunga sita.

Jabir ambae amecheza michezo saba mpaka sasa sawa na dakika 562 amefanikiwa kufunga mabao hayo na akitoa pasi saidizi moja ndani ya Ligi Kuu ya NBC.

Peter Shalulile wa timu ya Young Africans ndie mchezaji anaefuatia ‘akichana’ nyavu za wapinzani mara nne, pasi saidizi moja katika michezo sita aliyocheza sawa na dakika 478.

Clatous Chama wa Simba ambaye amecheza dakika 502 sawa na michezo sita amefanikiwa kufunga mabao manne ndani ya Ligi Kuu ya NBC.

Obrey Chirwa wa Geita Gold amefanikiwa kucheza michezo mitano sawa na dakika 360 na kufanikiwa kufunga mabao manne hadi sasa.

Abdul Suleiman ‘Sopu’ wa Azam nae hayuko mbali amefanikiwa kufunga mabao manne akicheza michezo mitano sawa na dakika 297.

TIMU ya Simba ‘imeshindikana’ ndani ya Ligi Kuu ya NBC msimu wa 2026/2027 baada ya kucheza michezo saba pasipo kupoteza mchezo wowote.

Simba imeshinda michezo yote hiyo na kuweza kukusanya alama 21, kufunga mabao 13 na kuruhusu mabao matatu ndani ya msimu huu.

Young Africans ndio inafuatia baada ya kucheza michezo saba huku timu hiyo ikishinda mechi sita na kufungwa mchezo mmoja aidha timu hiyo imefunga mabao 17 ikiruhusu mabao manne tu na kuweza kukusanya alama 18.

Azam imecheza michezo nane ikishinda michezo mitano kufungwa mmoja na sare mbili huku timu hiyo ikiweza kukusanya alama 17 kufunga mabao 13 na kufungwa mabao saba.

Mashujaa imeweza kucheza michezo saba ushindi nne na kufungwa tatu aidha timu hiyo imefunga mabao nane kufungwa moja na kukusanya alama 12.

Singida Black Stars amecheza michezo nane, ushindi tatu, sare mbili na kupoteza michezo mitatu huku timu hiyo ikifunga mabao 14 kufungwa 11 na kukusanya alama 11.

Dodoma Jiji imecheza michezo saba ushindi tatu, sare mbili na kufungwa michezo miwili, aidha timu hiyo imeweza kufunga mabao Matano kufungwa Matano na kukusanya alama 11.

Polisi Tanzania, Mbeya City, JKT Tanzania zimecheza michezo saba ushindi michezo mitatu, sare moja na kufungwa michezo mitatu kila timu huku ikikusanya alama 10.

Coastal Union na Namungo wamecheza michezo nane kila timu ushindi michezo mitatu, sare moja kwa Coastal Union huku Namungo akiwa bado hana sare, Coastal imepoteza michezo minne Coastal na Namungo mitano, Coastal ikikusanya alama 10 na Namungo alama tisa.

Geita Gold imecheza michezo saba ushindi michezo miwili sare moja na kufungwa michezo minne huku ikikusanya alama saba.

TRA United na Kagera Sugar zimecheza michezo saba kila timu huku zikishinda mchezo mmoja, sare tatu kwa TRA, mbili kwa Kagera, kufungwa tatu kwa TRA na kufungwa michezo minne Kagera Sugar aidha TRA imekusanya alama sita na Kagera ikikusanya alama tano.

Pamba Jiji na Fountain Gate zimecheza michezo saba ushindi mchezo mmoja kila timu sare moja na kufungwa michezo mitano aidha timu hizo zimekusanya alama nne kila mmoja.

Timu ya Simba imeibuka na ushindi kwenye dabi ya Kariakoo baada ya kuifunga timu ya Young Africans bao 2-1 katika mchezo wa Ligi Kuu ya NBC uliochezwa Oktoba 10 katika uwanja wa Uhuru jijini Dar-es Salaam.

Mchezo huo ulioanza majira ya saa 1:00 usiku ulikuwa muhimu kwa timu zote ili kujiweka katika nafasi nzuri kwenye msimamo wa Ligi Kuu ya NBC baada ya timu hizo kucheza takribani michezo sita bila kupoteza.

Mchezo ulianza kwa kasi na timu zote kushambuliana na iliwachukua dakika tano timu ya Young Africans kufungua ukurasa wa mabao kupitia mshambuliaji wake Peter Shalulile aliyepokea pasi kutoka kwa Maxi Nzengeli bao lililodumu hadi mwisho wa kipindi cha kwanza.

Kipindi cha pili kilirejea huku Simba wakishambulia kwa kasi ambapo Kocha Steve Barker aliamua kufanya mabadiliko kwa kumtoa Chama na kumuingiza Keletso Makgalwa na dakika ya 67 kiungo wa Simba Neo Maema aliifungia timu yake bao la kwanza hivyo ubao kusomeka 1-1.

Dakika ya 71 Ellie Mpanzu aliiandikia timu ya Simba bao la pili baada ya kupokea pasi kutoka kwa Keletso Makgalwa hivyo ubao kusomeka 2-1.

Dakika 90 zilitamatika katika dimba la Uhuru kwa Simba kupata ushindi wa mabao 2-1 dhidi ya mtani wake na mpinzani wake wa karibu katika Ligi Kuu ya NBC na mchezaji wa Simba Ellie Mpanzu alichaguliwa kuwa mchezaji bora wa mchezo huo.

KIUNGO mshambuliaji wa Dodoma Jiji, Berno Ngassa amechaguliwa kuwa Mchezaji Bora wa mwezi Septemba wa Ligi Kuu ya NBC msimu wa 2026/27, huku Fikiri Elias wa Coastal Union akichaguliwa Kocha Bora wa ligi hiyo kwa mwezi huo.

Ngassa alionesha kiwango kizuri chenye mwendelezo akiwashinda Maabad Maabad wa Coastal Union na Anuary Jabir wa Polisi Tanzania, alioingia nao fainali katika mchakato wa Tuzo za Mwezi uliofanywa na Kamati ya Tuzo za Shirikisho la Mpira wa Miguu Tanzania (TFF).

Mchezaji huyo alitoa mchango mkubwa kwa timu yake katika michezo miwili ambayo ilicheza mwezi huo na kushinda yote, huku nyota huyo akifunga bao moja na kuhusika na lingine moja.

Kwa upande wa Fikiri aliyeingia fainali na Steve Barker wa Simba na Vicent Mashami wa Dodoma Jiji, aliiongoza Coastal Union kushinda michezo yote miwili iliyocheza mwezi huo na kupanda kutoka nafasi ya 15 hadi ya 11 kwenye msimamo wa ligi.

Kamati pia imeteua mabao matatu bora, ambayo yatapigiwa kura na mashabiki ili kupata bao bora la mwezi Septemba. Mabao hayo ni  Haroun Lyawatwa (Mashujaa v Singida BS), Anuary Jabir (Polisi V Mbeya City) na Mohamed Damaro (Singida BS v Namungo).

Pia Kamati ya Tuzo imemchagua Ramadhan Kalanje wa KMC kuwa Mchezaji Bora wa Mwezi Septemba wa Ligi ya Championship ya NBC, akiwashinda Abiud Mtambuku wa Mbeya Kwanza na kipa Haroun Mandanda wa Rhino Rangers.

Kwa upande wa Kocha Bora wa ligi hiyo, kamati ilimchagua Mohamed Muya wa KMC aliyeiongoza timu yake kushinda michezo yote mitatu iliyocheza mwezi huo akiwashinda Salvatory Edward wa Rhino Rangers na Said Lyakuka wa Transit Camp alioingia nao fainali.