Kamati ya Uendeshaji na Usimamizi wa Ligi ya Bodi ya Ligi Kuu Tanzania (TPLB) katika kikao chake cha Agosti 21, 2026 ilipitia mwenendo na matukio mbalimbali ya Ligi na kufanya maamuzi yafuatayo;

Ligi Kuu ya NBC

Mechi Namba 001: Pamba Jiji 1-1 Dodoma Jiji

Klabu ya Dodoma Jiji imetozwa faini ya Sh. 5,000,000 (milioni tano) kwa kosa la wachezaji wake kuonekana wakifanya kitendo kinachoashiria imani za kishirikina kuelekea mchezo tajwa hapo juu.Wakati wa kufanya mazoezi Wachezaji hao walijikusanya Katikati ya uwanja na kuweka duara kuashiria kuomba dua lakini mmoja kati ya wachezaji hao alionekana akichimbia vitu chini.

Adhabu hii ni kwa mujibu wa Kanuni ya 48:1 ya Ligi Kuu kuhusu Udhibiti kwa Klabu.

Klabu ya Pamba Jiji imepewa Onyo Kali kwa kosa la kuchelewa kuwasili kwenye uwanja wa CCM Kirumba, Mwanza kuelekea mchezo tajwa hapo juu Agosti 14, 2026.Pamba iliwasili uwanjani saa 6:51 Mchana badala ya saa 6:30 Mchana jambo ambalo ni kinyume na matakwa ya Kanuni ya 17:15 ya Ligi Kuu kuhusu Taratibu za Mchezo.

Adhabu hii ni kwa mujibu wa Kanuni ya 17:62 ya Ligi Kuu kuhusu Taratibu za Mchezo.

Mechi Namba 0010: Namungo 1-0 Geita Gold

Klabu ya Namungo imepewa onyo kali kwa kosa la vijana waokota mipira (Ball Boys) kuficha mipira na wakati mwingine kutoifata kabisa pindi mipira hiyo ilivyotoka nje. Kitendo hicho si cha kiungwana na kiuanamichezo, Kamati inatoa angalizo kwa klabu zote kuheshimu na kuzingatia kanuni ya Uchezaji wa Kiungwana.

Adhabu hii ni kwa mujibu wa Kanuni ya 17:62 ya Ligi Kuu kuhusu Taratibu za Mchezo.

Mechi Namba 0012: Pamba Jiji 1-2 Simba SC

Klabu ya Simba imetozwa faini ya Sh. 5,000,000 (milioni tano) kwa kosa la mashabiki wake kuwarushia chupa waamuzi wa mchezo tajwa hapo juu wakati wa mapumziko hali iliyofanya waamuzi hao kushindwa kutumia vyumba vya kubadilishia nguo.

Adhabu hii ni kwa mujibu wa Kanuni ya 48:1 ya Ligi Kuu kuhusu Udhibiti kwa Klabu.

Mchezaji wa Simba Ibraheem Jabaar ametozwa faini ya Sh 5,000,000 (milioni tano) kwa kosa la kumpiga kiwiko mchezaji wa Pamba Jiji jezi namba 35 (Abdulkarim Iddy) pamoja na hiyo, adhabu ya kadi nyekundu itaendelea kubaki kama ilivyo.

Adhabu hii ni kwa mujibu wa Kanuni ya 42:5(5.2) ya Ligi Kuu kuhusu Udhibiti kwa Wachezaji.

Mechi Namba 0013: Kagera Sugar 1-1 Singida BS

Mchezaji wa Singida BS Mathew Tegisi amefungiwa michezo mitatu (3) na kutozwa faini ya Sh 5,000,000 (milioni tano) kwa kosa la kumpiga kiwiko mchezaji wa Kagera Sugar jezi namba 12 (Salehe Seif).

Adhabu hii ni kwa mujibu wa Kanuni ya 42:5(5.2) ya Ligi Kuu kuhusu Udhibiti kwa Wachezaji.

Mwamuzi wa kati wa mchezo tajwa hapo juu, Tatu Malogo kutoka Tanga amepewa Onyo Kali kwa kosa la kuonesha mapungufu ya kiuchezeshaji yaliyotokana na kushindwa kutafsiri vema sheria za mpira wa miguu.

Adhabu hii ni kwa mujibu wa Kanuni ya 43:1(1.8) ya Ligi Kuu kuhusu Udhibiti kwa Waamuzi.

 TAARIFA MAALUM

Kamati inazikumbusha timu zote kuzingatia kikamilifu masharti ya Kanuni ya 20 kuhusu Matumizi ya Teknolojia ya Football Video Support System (FVS).Kwa mujibu wa Kanuni ya 20(4), ni Kocha Mkuu au kiongozi mwingine wa juu kwenye benchi la ufundi pekee mwenye haki ya kuwasilisha ombi la marejeo ya tukio katika FVS, kwa kuwasiliana na Mwamuzi wa Akiba (Fourth Official).

Aidha, kwa mujibu wa Kanuni ya 20(4)4.1, iwapo mchezaji ataona tukio linahitaji marejeo ya FVS, anatakiwa kuwasiliana kwa ishara na Kocha Mkuu au kiongozi wa benchi la ufundi, ambaye ndiye atakayewasilisha ombi hilo.

Ni marufuku kwa mchezaji kumkabili, kumlalamikia au kumshinikiza mwamuzi moja kwamoja kwa lengo la kuomba marejeo ya FVS. Mchezaji atakayekiuka masharti hayo ataadhibiwa kwa mujibu wa Kanuni ya 17:62.

Kamati itaendelea kusimamia utekelezaji wa kanuni hizi, na adhabu zitatolewa dhidi ya watakaobainika kukiuka masharti yaliyowekwa.

LIGI Kuu ya NBC imeendelea kwa michezo mitatu iliyochezwa katika viwanja vya Arusha na Dar es Salaam, huku Polisi Tanzania, Young Africans na Azam zikivuna ushindi.

 

Mchezo wa kwanza uliopigwa Uwanja wa Sheikh Amri Abeid jijini Arusha uliwakutanisha Polisi Tanzania na JKT Tanzania, ambapo Polisi Tanzania iliibuka na ushindi wa mabao 2-0.

 

Polisi Tanzania ilianza kupata bao katika dakika ya 45+2 kupitia Kenny Ally, kabla ya Habib Kyombo kuongeza bao la pili dakika ya 65 na kuipa timu yake ushindi wa nyumbani.

 

Uwanja wa KMC Complex jijini Dar es Salaam, Young Africans iliendelea na matokeo mazuri baada ya kuichapa Coastal Union mabao 4-1.

 

Albert Kangandwa aliifungia Yanga bao la kwanza dakika ya 37, huku Maxi Nzengeli akiongeza la pili dakika ya 45+4.

 

Yanga iliendelea kutawala mchezo na kuongeza mabao mawili kupitia Mudathir Yahya dakika ya 49 na Mohamed Hussein dakika ya 90+5.

 

Coastal Union ilipata bao lake pekee dakika ya 77 kupitia Gradi Lassa.

 

Coastal Union ilimaliza mchezo ikiwa na wachezaji 10 baada ya Geoffrey Manyasi kuonyeshwa kadi nyekundu.

 

 

Katika mchezo wa usiku uliochezwa saa 3:00 katika Uwanja wa Azam Complex jijini Dar es Salaam, Azam iliibuka na ushindi wa mabao 2-1 dhidi ya TRA United.

 

Azam ilianza kwa kasi na kupata bao la kwanza dakika ya 8 kupitia Iddi Selemani, kabla ya Abdul Suleiman kuongeza bao la pili dakika ya 33.

 

TRA United ilipunguza pengo dakika ya 45 kupitia Ousmane Kamisoko na kufanya mchezo kuendelea kuwa na ushindani.

 

Azam ilimaliza mchezo ikiwa na changamoto baada ya mlinda mlango wake, Aishi Manula, kuonyeshwa kadi nyekundu kufuatia kufanya rafu.

 

Pamoja na kucheza pungufu, Azam iliweza kulinda uongozi wake hadi dakika ya mwisho na kuondoka na alama tatu muhimu.

LIGI Kuu ya NBC imeendelea kwa michezo mitatu iliyochezwa mkoani Mbeya, Mwanza na mkoani Kagera.

Mchezo wa kwanza uliwakutanisha mbeya city na Dodoma jiji na ‘wababe’ wa Mbeya kupata ushindi wa mabao 2-0 dhidi ya Dodoma Jiji kwenye uwanja wa Sokoine.

Wenyeji hao walihitaji dakika 9 pekee kuandika bao la kwanza kupitia kwa Mwani Thobias, kabla ya Yahya Mbegu kuifungia Mbeya City bao la pili dakika ya 72 na kuifanya Dodoma Jiji kuondoka Mbeya mikono mitupu.

Mchezo mwingine uliovuta hisia ulipigwa saa 10:15 jioni katika Uwanja wa CCM Kirumba jijini Mwanza, ambapo Simba ilikuwa ugenini dhidi ya Pamba Jiji na kupata ushindi wa mabao 2-1.

Simba ilianza mchezo kwa kasi na kupata bao la kuongoza dakika ya 19 kupitia Clatous Chama, kabla ya Anicet Oura kuongeza bao la pili dakika ya 31.

Hata hivyo, mambo yalibadilika kwa Simba dakika ya 39 baada ya Ibraheem Jabaar kuonyeshwa kadi nyekundu kwa kucheza vibaya na hivyo Simba kulazimika kuendelea na mchezo ikiwa na wachezaji pungufu.

Pamba Jiji ilitumia nafasi hiyo kuongeza presha na hatimaye kupata bao la kufutia machozi dakika ya 72 kupitia mkwaju wa penalti uliopigwa na Diomande Idris.

Licha ya Pamba Jiji kusukuma mashambulizi katika kipindi cha mwisho, Simba iliweza kusimama imara na kulinda ushindi wake hadi filimbi ya mwisho

Mkoani Kagera, katika Uwanja wa Kaitaba, mchezo mwingine wa kusisimua uliwakutanisha Kagera Sugar na Singida Black Stars uliomalizika kwa sare ya 1-1.

Kagera Sugar ilianza vyema na kupata bao dakika ya 13 kupitia Kassim Feka, hali iliyowapa wenyeji matumaini ya kuondoka na alama zote.

Hata hivyo, Singida Black Stars haikukubali kushindwa na ilirejea kipindi cha pili kwa nguvu zaidi.

Juhudi zao zilizaa matunda dakika ya 50 baada ya Jonathan Sowa kuisawazishia timu yake.

Bao hilo liliifanya mechi kuwa ya ushindani zaidi, huku pande zote zikisaka bao la ushindi, lakini juhudi zao hazikuzaa matunda hadi dakika za mwisho.

Kwa ujumla, michezo hiyo imeendelea kuonyesha ushindani mkubwa , huku Mbeya City ikifurahia ushindi wa nyumbani, Simba ikivuna alama ugenini licha ya kucheza pungufu, na Kagera Sugar pamoja na Singida Black Stars zikigawana alama katika Uwanja wa Kaitaba.

 

Ligi Kuu ya NBC msimu wa 2026/27 imeendelea jana kwa mzunguko wa pili kwa kuzikutanisha timu za Fountain gate na Mashujaa mchezo wa mapema saa 10:00 alasiri mkoani Arusha,huku mchezo mwingine ukichezwa saa 1:00 usiku mkoani Lindi ukiwakutanisha Namungo na Geita Gold.

Katika Uwanja wa Sheikh Amri Abeid jijini Arusha, Fountain Gate ilikusanya alama tatu muhimu kwa bao la Kassim Shaban dakika ya 10.

Bao hilo lilitosha kuipa Fountain Gate alama muhimu mbele ya mashabiki wake, huku Mashujaa ikishindwa kupata bao la kusawazisha hadi filimbi ya mwisho na kuondoka ugenini mikono mitupu.

Mchezo mwingine uliopigwa Uwanja wa Majaliwa mkoani Lindi uliwakutanisha Namungo na Geita Gold, ambapo wenyeji Namungo walitumia vyema faida ya uwanja wa nyumbani na kupata ushindi wa bao 1-0.

Hashimu Manyanya ndiye aliyekuwa shujaa wa Namungo baada ya kuifungia timu yake bao la ushindi dakika ya 25, bao lililodumu hadi mwisho wa mchezo.

Geita Gold, licha ya jitihada za kutafuta bao la kusawazisha, haikuweza kupata matokeo na hivyo kulazimika kuondoka Lindi bila alama.

Matokeo hayo yamezifanya Fountain Gate na Namungo kuanza safari kwa ushindi wa nyumbani huku Mashujaa na Geita Gold zikipoteza alama ugenini.

 

Ligi Kuu ya NBC msimu wa 2026/27 inaendelea leo, Agosti 18, kwa michezo miwili inayotarajiwa kutoa ushindani mkubwa katika mzunguko wa pili wa ligi.

Huko Arusha, Fountain Gate itakuwa mwenyeji wa Mashujaa katika mchezo utakaopigwa saa 10:00 alasiri kwenye Uwanja wa Sheikh Amri Abeid.

Mchezo huo unatarajiwa kuwa wa ushindani kutokana na timu zote kutafuta matokeo muhimu mapema katika msimu.

Fountain Gate itakuwa na jukumu la kutumia vizuri faida ya kucheza nyumbani, huku Mashujaa ikilenga kuondoka na matokeo mazuri katika safari yake jijini Arusha.

Kwa mujibu wa ratiba rasmi ya Bodi ya Ligi Kuu Tanzania, mchezo huo ni sehemu ya michezo ya wiki ya pili ya Ligi Kuu ya NBC

Wakati huo huo, huko Lindi, Namungo itakuwa mwenyeji wa Geita Gold katika mchezo utakaopigwa saa 1:00 usiku kwenye Uwanja wa Majaliwa.

Namungo itaingia uwanjani ikitafuta kutumia vyema uwanja wake wa nyumbani, wakati Geita Gold, ambayo ilianza msimu kwa ushindi wa 1-0 dhidi ya Mbeya City itajaribu kuendeleza mwanzo wake mzuri wa msimu.

Mchezo wa Lindi unatarajiwa kuwa na mvuto kutokana na umuhimu wa kila timu kupata alama katika hatua hii ya mwanzo ya msimu.

Kwa Namungo, ushindi mbele ya mashabiki wake unaweza kuwa kichocheo muhimu, huku Geita Gold ikitafuta matokeo yatakayoiweka katika mwendelezo mzuri.

Kwa ujumla, michezo yote miwili ya leo ina umuhimu mkubwa katika kujenga mwelekeo wa timu hizo katika msimu mpya wa Ligi Kuu ya NBC, huku kila upande ukisaka alama tatu muhimu