MSIMU wa First League 2025/26 umeendelea kutoa ushindani mkubwa baada ya kila timu kucheza mechi tisa huku vita ya kusaka nafasi ya kupanda Ligi ya NBC Championship ikizidi kupamba moto katika makundi yote mawili.

Kwenye kundi A timu ya Bandari Tanzania inaonekana kuwa na kasi kubwa zaidi baada ya kujikusanyia alama 20, wakiongoza msimamo mbele ya Nyumbu yenye alama 18 huku tofauti ya alama mbili pekee kati ya timu hizo ikionyesha wazi kuwa mbio za kileleni bado hazijaamuliwa na kila mchezo uliosalia utakuwa na uzito mkubwa.

Takwimu za Bandari zinaonyesha uimara mkubwa, wakiwa na ushindi kwenye michezo sita, sare mbili na kupoteza mchezo mmoja pekee, huku safu yao ya ushambuliaji ikiwa tayari imefunga mabao 17. 

Nafasi ya tatu inashikiliwa na Cosmopolitan ambayo haipo mbali baada ya kufikisha alama 16, jambo linalofanya kundi A kuwa moja ya makundi yenye ushindani mkali zaidi ambapo tofauti ndogo ya alama kati ya timu tatu za juu ikiashiria kuwa mzunguko wa pili unaweza kubadili kabisa ramani ya msimamo.

Kwa upande wa kundi B timu ya Rhino Rangers imekuwa bora zaidi hadi sasa ikiwa na alama 24 baada ya mechi 9 ikionyesha ubora mkubwa kwa kushinda michezo minane na kupoteza mmoja pekee.

Safu ya ushambuliaji ya ‘maafande’ hao imefunga jumla ya mabao 21, idadi kubwa zaidi kwenye makundi yote mawili ya First League huku wakiruhusu mabao saba pekee huku hii ikiwa sababu kubwa ya kuwa kwenye nafasi kubwa ya kumaliza kileleni na kukata tiketi ya moja kwa moja kuelekea NBC Championship. 

Timu za IAA na Endument bado wapo kwenye mbio hizo wakishika nafasi ya pili na tatu ingawa wanalazimika kuongeza kasi ili kuzuia Rhino Rangers wasiweke uwiano mkubwa wa alama zaidi kileleni.

VITA YA MTOANO NA JANGA LA KUSHUKA DARAJA.

Mbali na vita vya juu, pambano la kujiokoa kushuka daraja pia limeanza kuchangamka sana.

Katika kundi A, Dar City inaonekana kuwa kwenye kipindi kigumu zaidi baada ya kubaki mkiani na alama 4 pekee, huku ikiwa tayari imeruhusu mabao 24 na kuwa na rekodi mbaya ya safu ya ulinzi ambayo imekuwa sababu kubwa ya timu hiyo kuwa katika hatari kubwa ya kushuka daraja.

Kwa kundi B hali ni mbaya zaidi kwa ‘Wanajeshi wa mpakani’ timu ya Biashara United ambayo hadi sasa ina deni la alama -1lililotokea baada ya kushindwa kufika uwanjani kwenye michezo miwili na kupokwa alama na mamlaka za soka kitu kinachoonyesha wazi namna walivyoanza msimu vibaya na jinsi kila mchezo uliosalia utakavyokuwa wa kama fainali kwao.

MICHEZO IJAYO KUAMUA HATMA.

Ratiba ya michezo ijayo inaweza kubadilisha kabisa sura ya misimamo yote miwili hasa kwa kundi A ambapo Bandari bado wanakabiliwa na mechi ngumu dhidi ya Nyumbu, Green Warriors na Cosmopolitan. 

Kwa kundi B macho yote yataelekezwa kwa Rhino Rangers kuona kama watakuwa na muendelezo mzuri au wapinzani wao wataanza kupunguza ‘pengo’ la alama.

Kwa ujumla, First League msimu huu imeonyesha ushindani wa hali ya juu, mabao mengi, na presha kubwa kuanzia nafasi za juu hadi chini ya msimamo na endapo kasi hii itaendelea mzunguko wa pili unaweza kuwa mmoja wa misimu yenye utofauti mkubwa zaidi kuwahi kushuhudiwa.

Ligi ya NBC Championship imetimiza mzunguko wa 21 huku ushindani ukizidi kupamba moto, timu zikionyesha wazi dhamira ya kupigania kupanda daraja kwenda Ligi Kuu ya NBC msimu ujao na nyingine zikipambana kusalia ligi hiyo msimu ujao.

Katika hatua hii ya ligi, kila alama imekuwa ya thamani kubwa, huku timu za juu ambazo ni Geita Gold, Kagera Sugar,Mbeya Kwanza na Transit Camp zikionekana kuongeza kasi ili kujihakikishia nafasi za moja kwa moja za kupanda daraja na mapambano hayo yameifanya ligi kuwa na mvuto mkubwa zaidi, ambapo matokeo ya kila wiki yamekuwa yakibadilisha mwelekeo wa msimamo wa ligi hiyo.

Kwa upande wa katikati ya msimamo penye timu za Bigman yenye alama yenye alama 27 ikishika nafasi ya saba, KenGold inafuata ikiwa na alama 26 sawa na Songea United na Gunners inayoshika nafasi ya 10 ikiwa imekusanya alama 23 hali inaendelea kuwa ngumu kwa timu hizo ambazo zinajikuta zikihitaji ushindi mfululizo ili kuepuka kuingia kwenye hatari ya kushuka daraja na jambo hil limeongeza ushindani mkali, kwani tofauti ya pointi kati ya timu hizo ni ndogo sana.

Wakati huo huo, timu za ‘mkiani’ ambazo ni African Sports inayoshika nafasi ya 15 na Barberian inayoshika nafasi ya 16 zinapambana kwa nguvu zote kujiokoa, hali inayofanya kila mechi kuwa ya ushindani wa hali ya juu na presha imekuwa kubwa kwa wachezaji na benchi la ufundi, huku makosa madogo yakigharimu matokeo makubwa.

Ligi hiyo pia imeendelea kuwa jukwaa muhimu kwa wachezaji kuonyesha viwango vyao, ambapo baadhi yao kama Obrey Chirwa anayekipiga kwenye timu ya Kagera Sugar anayeongoza mbio za ufungaji na Ramadhan Karanje wa B19 aliyeibuka mchezaji bora wa mwezi Februari wameanza kuvutia macho ya klabu kubwa kutokana na kiwango wanachoonyesha uwanjani.

Kadri msimu unavyozidi kusonga mbele, wachambuzi wa soka wanaamini kuwa ushindani utaongezeka zaidi, hasa katika nafasi za juu zinazoongozwa na kinara Geita Gold zinazotoa tiketi ya kupanda Ligi Kuu ya NBC pamoja na zile za mkiani zinazohusisha mapambano ya kuepuka kushuka Ligi ya First League.

Kwa sasa, macho ya wadau wa soka yameelekezwa kwenye hatua zijazo za ligi hiyo iliyosimama kwa takribani mwezi mmoja, wakisubiri kuona ni timu zipi zitafanikiwa kuhimili presha na kuandika historia ya kupanda daraja mwishoni mwa msimu na zipi zitaweza kuamka na kusalia kwenye ligi msimu ujao.

TIMU ya Young Africans ‘Wananchi’ imezidi kuchanja mbuga kwenye mbio za kuwania ubingwa wa Ligi Kuu ya NBC baada ya kushinda mchezo wa 11 Kwenye michezo 13 ikiwa haijapoteza hata mmoja na kutoa sare miwili pekee.

’Wananchi’ wameongeza ushindi huo baada ya kuifunga Tanzania Prisons iliyokuwa mwenyeji wa mchezo huo uliopigwa uwanja wa Jamhuri, Dodoma baada ya uwanja wao ‘mama’ wa Sokoine, Mbeya kufungiwa kupisha maboresho.

Laurindo Dilson ‘Depu’ aliandika bao lake la sita msimu huu likiwa bao pekee lililopeleka furaha kwenye mitaa ya ‘Jangwani’ baada ya mchezo uliopita Young Africans kutoa sare na mahasimu wao wakubwa timu ya Simba.

Young Africans wanaendelea kujichimbia kwenye ‘kilele’ cha Ligi Kuu ya NBC wakifikisha jumla ya alama 35 baada ya kucheza michezo 13 huku timu inayowafuata kwa karibu (JKT Tanzania) ikicheza michezo … zaidi ya ‘Wananchi’.

Ingawa Depu aliingia kwenye mchezo huo alifanikiwa kuondoka na tuzo ya mchezaji bora wa mchezo hii ni baada ya bao alilofunga na kiwango alichokionyesha kuipa alama tatu muhimu Young Africans ambao ndio mabingwa watetezi wa Ligi Kuu ya NBC.

BAADA ya kuifunga Fountain Gate mabao 4-1 ugenini timu ya TRA imeshinda mchezo wa pili mfululizo wa Ligi Kuu ya NBC baada ya kuifunga Namungo mabao 2-0 katika uwanja wa Black Rhino uliopo wilaya ya Karatu mkoani Arusha.

Mabao ya Chamou Karaboue na Joseph Akandwanaho yalitosha kuwapa furaha ‘walipa kodi’ huku yakipeleka huzuni na vilio kwa ‘Wauaji wa kusini’ wenyeji wa mkoa wa Lindi..

Chamou aliyesajiliwa na TRA akitokea kwa ‘wababe’ wa Kariakoo timu ya Simba alifunga bao lake la kwanza kwa timu yake huku akipokea pasi ya mwisho kutoka kwa Valentin Nouma aliyekuwa Simba pia ndiye aliyeibuka mchezaji bora wa mchezo huo akiisaidia kupata alama tatu bila kuruhusu bao.

Mkoani Singida kwenye uwanja wa Airtel Stadium timu ya Singida Black Stars ilishindwa kutamba nyumbani ikikubali kipigo cha mabao 2-1 kutoka kwa Simba na kupoteza mchezo wa pili mfululizo nyumbani baada ya kufungwa 3-0 na Young Africans.

Anicet Oura alikuwa wa kwanza kufungua akaunti ya mabao kwa ‘Mnyama’ akitumia vizuri pasi ya kichwa kutoka kwa Allasane Kante bao ambalo lilifutika dakika chache kabla ya mapumziko baada ya Ndumumwe Mossi kuisawazishia Singida.

Dakika tano kabla ya dakika 90 kukamilika Elie Mpanzu aliyeingia akitokea benchi alitumia vizuri pasi ya mchezaji bora wa mchezo huo Clatous Chama na kuiandikia Simba bao la pili lililohakikisha alama tatu muhimu kwa ‘Mnyama’ zilizomfanya kufikisha alama 27 na kutia kambi nafasi ya nne kwenye msimamo wa Ligi Kuu ya NBC.

Mchezo wa mwisho ulishuhudia ‘matajiri wa chamazi’ timu ya Azam ikiishushia kipigo timu ya Dodoma jiji kwa mabao 3-0 kwenye uwanja wa Jamhuri mkoani Dodoma na kupaa hadi nafasi ya tatu kwenye msimamo wa Ligi Kuu ya NBC.

Mchezo huo ulioshuhudia kiungo Feisal Salum akifunga bao moja na kutoa pasi ya bao baada ya kurejea uwanjani akitoka kutumikia adhabu aliyopewa baada ya kuoneshwa kadi nyekundu kwenye mchezo dhidi ya Pamba Jiji.

Mabao mengine yalifungwa na mchezaji wa zamani wa Dodoma Zidane Sereri aliyekuwa mwiba mkali kwa ‘walima zabibu’ na kushinda tuzo ya mchezaji bora wa mchezo huo akiingia kambani mara mbili.