Author: Honest Mwanitega

by Honest Mwanitega

NBC CHAMPIONSHIP YAFIKA PATAMU.

IKIKAMILISHA mizunguko 15 Ligi ya NBC Championship imepamba moto timu zote zikiwa zimecheza michezo 15 huku zikisaliwa na michezo 15 kufunga msimu.

Geita Gold inaongoza mbio za ubingwa ikiwa na alama 37 baada ya kushinda michezo 11 huku ikiwa timu pekee ambayo haijapoteza mchezo wowote hadi sasa.

Kagera Sugar inashika nafasi ya pili ikiwa na alama 36 ikipoteza mchezo mmoja pekee kwenye mzunguko wa 15 dhidi ya ‘wababe’ wa mkoa wa Tabora timu ya Mbeya Kwanza inayokamata nafasi ya tatu ikiwa na alama 34.

Transit Camp inashika nafasi ya nne ikiwa na alama 33 ikizidiwa alama nne pekee na vinara wa ligi hiyo timu ya Geita Gold, Transit ikiwa imeshinda michezo 10 hadi sasa, ikipoteza miwili na kutoa sare mitatu.

Bingwa wa ligi ya Championship ya NBC atapata Kikombe na kupanda daraja moja kwa moja hadi Ligi Kuu ya NBC, mshindi wa pili akipanda daraja huku mshindi wa tatu na wa nne wakicheza mchezo wa mtoano na timu itakayoshinda kwenye matokeo ya jumla itacheza na timu ya Ligi Kuu ya NBC ili kupata timu moja itakayoshiriki ligi hiyo ya nne kwa ubora Afrika msimu wa 2026/27.

by Honest Mwanitega

AZAM, COASTAL WANA KIKAO LIGI KUU YA NBC LEO.

MATAJIRI wa Chamazi timu ya Azam leo itakuwa na kibarua cha kusaka alama tatu muhimu nyumbani dhidi ya Coastal Union kwenye uwanja wa Azam Complex, Dar es Salaam.

Ikiwa na kumbukumbu mbaya ya kuanza mwaka 2026 vibaya baada ya kupoteza kwenye fainali ya Kombe la Mapinduzi dhidi ya Young Africans Azam itavaana na Coastal inayoshika nafasi ya 12 kwenye msimamo wa Ligi Kuu ya NBC.

Azam inayoshika nafasi ya tisa bado haijapoteza mchezo wowote wa ligi hiyo msimu huu sawa na timu ya Young Africans ambayo pia haijapoteza mchezo.

Tayari Coastal Union imepoteza michezo mitatu msimu huu ikishinda miwili na kutoa sare mitatu ikiwa imekusanya jumla ya alama tisa hadi sasa.

Huu ni mchezo pekee wa Ligi Kuu ya NBC unaopigwa leo baada ya jana timu ya Dodoma Jiji kulazimishwa sare ya bao moja nyumbani na Singida Black Stars.

 

by Honest Mwanitega

DODOMA, SINGIDA ZATOSHANA NGUVU LIGI KUU YA NBC.

UKIWA mchezo wa kwanza unaorejesha ladha za Ligi Kuu ya NBC baada ya kusimama kwa takribani wiki tano umeshuhudia timu za Dodoma Jiji na Singida Black stars zikimaliza kwa sare ya bao moja na kugawana alama kwenye uwanja wa Jamhuri, Dodoma.

Mchezo huo uliokuwa mkali na wa kusisimua ulishuhudia mabao ya timu zote mbili yakipatikana dakika za ‘jioni’ kwa mikwaju ya penati iliyopigwa na Yasin Mgaza (Dodoma) dakika ya 83 na Marouf Tchakei (Singida) dakika ya 96.

Hii ni sare ya nne kwa timu ya Dodoma Jiji msimu huu huku ikuwa sare ya tatu kwa timu ya Singida Black Stars inayoiwakilisha Tanzania na Ligi ya nne kwa ubora Afrika (NBC) kwenye mashindano ya kimataifa msimu huu.

Akizungumza baada ya mchezo kocha mkuu wa Dodoma Jiji Amani Josiah amesema kukosa umakini kwa wachezaji wake kumesababisha kupoteza alama tatu na kuipata alama moja ingawa amewasifu kwa kiwango walichoonyesha ingawa mpinzani wao (Singida BS) alikuwa mgumu.

”Tumepata bao kipindi cha pili japo kipindi cha kwanza tumetengeneza nafasi nzuri za kupata mabao na endapo tungezitumia vizuri tungepata ushindi, yote kwa yote nawasifu wachezaji wangu wamepambana sana na hii alama moja tuliyoipata itatusaidia kutujenga huko mbele tunapoelekea” alisema Josiah.

Naye kocha mkuu wa Singida BS David Ouma raia wa Kenya amewasifu Dodoma kwa matumizi ya mipira mirefu iliyowapa changamoto wachezaji wake ingawa amewasifu vijana wake pia kwa kuonyesha mchezo mzuri.

”Mbinu waliyokuja nayo Dodoma kupiga mipira mirefu ilivuruga wachezaji wangu nyuma na kuwapa faida wao na endapo tungefanikiwa kuzuia mipira hiyo kipindi cha kwanza ingetusaidia kupata matokeo bora zaidi leo. Naamini kurejea kwa ligi kutatusaidia kuendelea kujijenga na kuwa bora zaidi katika michezo inayokuja” Alisema Ouma.

 

by Honest Mwanitega

TRANSIT YAFUKUZA ‘MWIZI’ KIMYA, BIGMAN, GEITA HAKUNA MBABE NBC CHAMPIONSHIP.

TIMU ya Transit Camp imerejea katika matokeo ya ushindi baada ya kuifunga KenGold bao moja kwenye uwanja wa nyumbani na kufanikiwa kusalia na alama zote tatu.

Mchezo huo uliopigwa uwanja wa TFF Center Kigamboni ulishuhudia Adam Uledi wa Transit Camp akiibuka shujaa kwa kuifungia Transit bao pekee kipindi cha pili kwa mkwaju wa penati huku likiwa bao la 11 kwake akiendelea kuongoza kwenye vinara wa mabao katika ligi ya Championship ya NBC.

Ushindi huo unaifanya Transit kufikisha alama 33 na kupanda hadi nafasi ya tatu ya msimamo ikiwa nyuma ya kinara wa ligi hiyo Geita Gold kwa alama nne pekee.

Mkoani Lindi kwenye uwanja wa Ilulu timu ya Bigman ilikuwa mwenyeji wa Geita Gold na kushuhudia mchezo huo ukikamilika kwa timu hizo kutoka sare ya bao moja.

Geita inayoongoza msimamo wa ligi hiyo kwa alama 37 imeshindwa kukusanya alama zote nyumbani kwa Bigman ambayo imeizidi alama 17 huku timu hiyo (Bigman) ikishika nafasi ya saba kwenye msimamo.

Hii ni sare ya pili mfululizo kwa timu ya Bigman kwenye uwanja wa nyumbani baada ya mchezo uliopita kulazimishwa sare na timu ya African Sports kutoka Tanga.

by Honest Mwanitega

ILULU, KIGAMBONI KINAWAKA LEO NBC CHAMPIONSHIP.

LIGI ya Championship ya NBC inatarajiwa kuendelea leo kwa mzunguko wa 15 huku viwanja vya Ilulu, Lindi na TFF Center Kigamboni vikitarajiwa kutimua vumbi leo.

Bigman ya Lindi itakuwa mwenyeji wa Geita Gold inayoshika usukani wa Ligi ya Championship ya NBC kwenye uwanja wa Ilulu huku timu ya Bigman ikiwa na kumbukumbu mbaya ya kulazimishwa sare kwenye uwanja huo na timu ya African Sports katika mchezo uliopita.

Hadi sasa timu ya Bigman imepoteza michezo mitano ya ligi hiyo na inakutana na Geita Gold ambayo haijapoteza mchezo wowote hadi sasa huku ikitoka sare michezo mitatu pekee.

Kwenye uwanja wa TFF Center Kigamboni timu ya Transit Camp itakuwa mwenyeji wa ‘wababe’ kutoka mbeya timu ya Kengold iliyoshiriki Ligi Kuu ya NBC msimu uliopita.

Transit Camp iliyopoteza mchezo uliopita kwa kipigo kikali cha mabao 3-0 dhidi ya Mbuni ugenini itashuka uwanjani kupambana na Kengold iliyopoteza pia ugenini kwa mabao 2-1 dhidi ya B19 inayoshika nafasi ya 13 kwenye msimamo huku ikiifanya B19 kufikisha ushindi wa pili msimu huu.

Transit Camp inahitaji kushinda mchezo wa leo ili kuweka hai matumaini ya kupanda daraja na kushiriki Ligi Kuu ya NBC msimu ujao ikishika nafasi ya nne kwenye msimamo hadi sasa nyuma ya vinara Geita Gold, Kagera Sugar na Mbeya Kwanza.