Author: Honest Mwanitega

by Honest Mwanitega

HAUSUNG, RHINO VINARA MBIO ZA KUPANDA LIGI YA CHAMPIONSHIP YA NBC.

LIGI ya First League inazidi kupamba moto kwenye viwanja tofauti huku timu za Hausang ya Makambako Njombe na Rhino Rangers ya Tabora zikiongoza mbio hizo.

Timu ya Hausang inaongoza kundi A baada ya kucheza michezo 12 ikishinda michezo sita, sare nne na kupoteza miwili huku ikifanikiwa kukusanya alama 22.

Timu ya Magnet inashika nafasi ya mwisho kwenye msimamo wa kundi hilo ikiwa na alama 11 baada ya kushinda michezo miwili, kupoteza mitano na sare tano.

Rhino Rangers inashikilia usukani wa kundi B ikikusanya alama 28 baada ya kushinda michezo tisa, sare mchezo mmoja na kupoteza michezo miwili.

Rhino inaongoza pia kwenye kupachika mabao ikifunga (30) huku Ruvu Shooting ikiwa timu iliyofunga mabao machache hadi sasa ikifunga mawili pekee.

Kinara wa kundi A atakutana na kinara wa kundi B katika mchezo wa mwisho wa msimu ili kumpata bingwa wa Ligi ya First League msimu wa 2024/25.

by Honest Mwanitega

SIMBA KUWAVAA DODOMA LEO LIGI KUU YA NBC.

LIGI Kuu ya NBC inatarajiwa kuendelea leo kwa mchezo mmoja utakaozikutanisha timu za Simba dhidi ya Dodoma kwenye uwanja wa KMC Complex, Dar.

Simba iliyoshinda mchezo wake wa Ligi Kuu ya NBC uliopita ugenini dhidi ya Coastal Union kwa mabao 3-0 inakutana na Dodoma Jiji iliyolazimishawa suluhu na Coastal kwenye uwanja wa Jamhuri, Dodoma.

Timu ya Simba inahitaji alama tatu leo ili kujiweka nafasi nzuri ya kutwaa ubingwa wa NBC msimu huu huku Dodoma ikihitaji kupata ushindi ili kujihakikishia nafasi ya kusalia kwenye Ligi Kuu ya NBC msimu wa 2025/26.

Mchezo huu ni wa kiporo ulioahirishwa baada ya timu ya Dodoma Jiji kupata ajali ya basi ilipokuwa ikitoka mkoani Lindi baada ya mchezo dhidi ya Namungo kwenye uwanja wa Majaliwa, Lindi.

by Honest Mwanitega

MTIBWA ‘MBABE’ NYUMBANI NA UGENINI NBC CHAMPIONSHIP.

TIMU ya Mtibwa Sugar inayoshikilia usukani wa Ligi ya Championship ya NBC imeendelea kuwa ‘Mwiba’ kwa timu za ligi hiyo kwa kushinda michezo mingi nyumbani na ugenini kuliko timu zote.

Mtibwa imeshinda michezo 11 nyumbani kwenye uwanja wa Manungu Complex, Morogoro huku ikishinda sita kwenye michezo yake ya ugenini na kuwa kinara wa ushindi nyumbani na ugenini.

Geita Gold inafuata ikiwa imeshinda michezo 10 kwenye uwanja wa Nyankumbu, Geita huku ikishinda minne ugenini sawa na timu za Mbeya Kwanza na Songea United.

Stand United ya Shinyanga na TMA FC ya Arusha zinashika nafasi ya tatu kwa kushinda michezo mingi kwenye uwanja wa nyumbani zikishinda michezo 9.

by Honest Mwanitega

LIGI KUU YA NBC KUTIMUA VUMBI LEO.

BAADA ya timu za KenGold, JKT Tanzania na Dodoma Jiji kuchukua alama tatu baada ya kushinda michezo yao hapo jana Ligi Kuu ya NBC inatarajiwa kuendelea tena leo kwa michezo mitatu itakayopigwa viwanja vitatu tofauti.

Mkoani Arusha timu ya Coastal Union iliyopoteza mchezo wake uliopita dhidi ya Pamba Jiji itakuwa mwenyeji wa Azam kwenye uwanja wa Sheikh Amri Abeid saa 10:00 alasiri.

Azam inaingia kwenye mchezo huo ikiwa na kumbukumbu nzuri ya kushinda mchezo uliopita nyumbani dhidi ya Mashujaa kwa mabao 2-0 yaliyofungwa na Zidane Sereri na Yoro Diaby.

Mkoani Kigoma timu ya Mashujaa iliyopoteza mchezo wake uliopita ugenini itakuwa mwenyeji wa timu ya Pamba Jiji ambayo imeshinda michezo mitatu mfululizo iliyopita bila kuruhusu bao katika michezo hiyo.

Mchezo wa mwisho utazikutanisha timu za Namungo itakayokuwa mwenyeji wa simba saa 12:30 jioni kwenye uwanja wa Mjaliwa, Lindi.

Timu ya Namungo inahitaji ushindi katika mchezo huo ili kujiweka katika nafasi nzuri ya kusalia kwenye Ligi Kuu ya NBC msimu ujao huku Simba ikihataji ushindi ili kuweka hai matumaini ya kutwaa ubingwa msimu huu.

by Honest Mwanitega

SIMBA, DODOMA KUPANGIWA TAREHE MPYA LIGI KUU YA NBC.

BODI ya Ligi Kuu Tanzania (TPLB), imeahirisha mchezo namba 148 wa Ligi Kuu ya NBC kati ya Simba SC na Dodoma Jiji ulipangwa kufanyika kwenye uwanja wa KMC Complex Februari 15, 2025 saa 10:00 alasiri.

Sababu ya kuahirishwa kwa mchezo huo ni baadhi ya wachezaji na maofisa wa ufundi wa klabu ya Dodoma Jiji kutokuwa katika hali nzuri kiafya baada ya basi la klabu hiyo walilokuwa wakisafiria kutoka Ruangwa mkoani Lindi, kupata ajali mkoani humo.

Ajali hiyo imesababisha athari hasi kwa klabu ya Dodoma Jiji kwa kuchelewesha safari yake ya kuelekea mkoani Dar es Salaam pamoja na kuathiri maandalizi ya kiufundi kwa kuwakosa wachezaji na maofisa wa ufundi ambao walipata majeraha katika ajali hiyo.

Ajali hiyo imepelekea Bodi ya Ligi Kuu Tanzania kuahirisha mchezo huo na itatangaza tarehe mpya hivi karibuni.